DILI, 16 Juñu 2025 (TATOLI)– Papa Leão XIV fó sai ofisialmente data kanonizasaun ba Beatu na’in sia durante Konsistóriu Públiku Ordináriu dahuluk ba ninia pontifikadu, ne’ebé hala’o iha Sesta (13/06), iha Vatikanu.
Tuir informasaun husi Vatican News, ne’ebe Tatoli asesu, fo sai katak Beatu Carlo Acutis ho Pier Giorgio Frassati, nia kanonizasaun sei hala’o hamutuk iha loron 07 Setembru 2025. Beatu na’in hitu seluk sei selebra sira nia kanonizasaun iha loron 19 fulan-Outubru tinan hanesan.
Serimónia iha Vatikanu ne’ebé partisipa kardeál sira, Amu-Papa, aprova elevasaun Beatu na’in sia nian hodi rekoñese sira-nia moris ezemplár fiar, karidade no sasin sarani nian.
Carlo Acutis no Frassati : Santu joven
Beatu Carlo Acutis, foin-sa’e italianu ida ne’ebé mate iha tinan 2006, koñesidu iha mundu tomak tanba ninia evanjelizasaun liuhosi internet no tanba ninia devosaun kle’an ba Eukaristia.
Beatu Pier Giorgio Frassati, ne’ebé mate iha tinan 1925, destaka tanba ninia kompromisu ba ema kiak sira no justisa sosiál, no konsidera nu’udar ezemplu santidade ativu nian iha mundu modernu.
Antes ne’e tuir planu, Acutis sei hetan kanonizasaun iha loron 27 fulan-Abril, durante Jubileu Adolesente sira-nian, no Frassati iha loron 03 Agostu, durante Jubileu Foin-sa’e sira-nian. Maibé, ho Papa Francisco nia mate iha fulan-Abril tinan ida-ne’e, data sira-ne’e hetan revizaun.
Papa Leão XIV hili atu halibur joven beatu na’in rua iha serimónia ida de’it, hodi simboliza, tuir nia, “kontinuidade fiar nian entre jerasaun sira no prezensa moris Kristu nian iha foin-sa’e sira horisehik nian no ohin nian”.
Santa Sé mós konfirma ona katak iha Domingu, 19 Outubru 2025, sei kanoniza tan beatu na’in hitu mak hanesan :
- Ignatius Choukrallah Maloyan, arsebispu Katóliku Arméniu no mártir durante jenosídiu 1915
- Peter To Rot, leigu no katekista martirizadu iha tinan 1945 tanba kontinua nia misaun durante okupasaun Japoneza iha Papua Nova Guiné
- Vincenza Maria Poloni, fundadora Institutu Irmán sira Mizerikórdia nian iha Verona
- María del Monte Carmelo Rendiles Martínez, fundadora Congregação das Servidoras de Jesus iha Venezuela
- Maria Troncatti, madre Filhas de Maria Auxiliadora, misionária iha Ecuador
- Bartolo Longo, konvertidu leigu no fundadór Santuáriu famozu Na’i-Feto Rozáriu nian iha Pompeia
- José Gregorio Hernández Cisneros, médiku venezuelanu ida ne’ebé koñesidu nu’udar “médiku ema kiak sira-nian”, no membru ida hosi Orden Fransiskanu Sekulár.
Jornalista : Cidalia Fátima
Editora : Armandina Moniz
