KOVALIMA, 17 Juñu 2025 (TATOLI) – Servisu Saúde Munisípiu (SSM) Kovalima kontinua rejista moras Infesaun vias Respiratória Aguda (IRA) ho númeru aas, tuir relatóriu ne’ebé mai husi Sentru saúde no postu saúde sira iha munisípiu Kovalima.
“Dadus ne’ebé mak Servisu Saúde Munisípiu Kovalima hahú husi Janeiru to’o Abríl ne’ebé ita simu nafatin rejista moras Infesaun vias Respiratória Aguda (IRA) aas hamutuk 7,337”, Diretór SSM Kovalima, Domingos Sequeira, relata dadus ne’e, ba jornalista, iha resintu AMC, ohin.
Dirijente ne’e esplika, IRA hanesan moras infesaun ida-ne’ebé haree ba klima hanesan kauza mai husi rai-rahun, anin, hafoin servisu komunidade sira la fase liman – direta ba han, tan ne’e mak halo komunidade sira sofre moras IRA.
Moras Infesaun vias Respiratória Aguda (IRA) mak infesaun virál, infesaun ne’ebé kauza hosi vírus ne’ebé akontese iha dalan iis-nian. Bainhira dada iis anin halai tuir ita-nia dalan iis nian molok to’o iha pulmaun.
Kauza moras Infesaun vias Respiratória Aguda (IRA) vírus no bakteria ne’ebé invade diretamente ita-nia dalan iis liuhusi matan inus no ibun. Vírus sira ne’ebé hamosu moras ne’e mak hanesan Rhinovirus,Coronoavirus no Andenovirus.
Rhinovirus maka kauza komún liu ba isin-manas baibain no pertense ba família virus Picornaviridae. Rhinovirus infeta liuliu pasajen nazál sira no hada’et liuhoui gotíkula respiratóriu sira, kontaktu diretu, no superfísie sira ne’ebé kontaminadu.
Coronavirus hanesan moras hada’et ida ne’ebé kauza husi virus SARS-CoV-2. Vírus ne’e afeta liuliu sistema respiratóriu, hodi hamosu sintoma sira ne’ebé varia hosi efeitu sira hanesan isin-manas ne’ebé kmaan to’o pneumonia maka’as.
Enkuantu, Adenovirus ne’e grupu ida husi virus sira ne’ebé bele hamosu infesaun sira iha sistema respiratóriu, matan, intestinu, via urinária, no sistema nervozu – tuir referénsia médika sira oioin.
Aleinde relata moras IRA informa mós moras sira hanesan diárea 1,636, pneumonia 1,221, Hipertensaun 1,184, asma bronkiál 302, skabies 187, diabetes 93, ulsera jenital 73, diárea ho raan 36 no COPD (Chronic Obstructive Pulmonary Disease) – Moras Pulmonár Obstrutiva Krónika 31.
Fó hanoin fali katak durante fulan 12 iha 2024 ne’e, Servisu Saúde Munisípiu Kovalima rejista moras IRA hamutuk 18,764 tanba kada trimestrál rejista moras Infesaun vias Respiratória Aguda (IRA) hamutuk 4,692.
Aleinde relata moras IRA informa moras sira hanesan rejista moras kulit seluk hamutuk 2,852 tanba kada trimesterál rejista 713 moras diáriea (tee-been) aguda 2,520 kada trimesterál rejista 630, pneumonia 1,300 kada trimesterál rejista 325, Scabies 264 kada trimestrál rejista 66 no moras diáriea ho raan 60 kada trimestrál rejista 15.
Jornalista:Celestina Teles
Editór: Rafael Ximenes de A. Belo
