DILI, 17 Juñu 2025 (TATOLI) – Prezidente Parlamentu Nasionál (PPN), Maria Fernanda Lay, hala’o enkontru ho Primeiru Ministru (PM), Xanana Gusmão, hodi ko’alia kona-ba kalendáriu submisaun proposta lei Orsamentu Jerál Estadu (OJE) 2026 ba órgaun lejizlativu ne’e.
“Oinsá mak haree data ba orsamentu”, Xanana dehan hafoin sorumutu iha PN.
Tuir Lei Enkuadramentu Orsamentál no Jestaun Finanseira Públika, iha loron 01 fulan-Outubru Governu halo submisaun proposta lei OJE ba PN.
Relembra katak, iha 13 Juñu 2025, Governu realiza Jornada Orsamentál 2026 hodi prepara OJE tinan oin ho tema “Otimiza Rezultadu sira ho Despeza Realístiku Sira” ho objetivu atu permite análize ba prioridade nasionál sira no define senáriu tetu fiskál ba ezersísiu tinan 2026 nian.
Tetu preliminár orsamentu fiskál 2026 ne’ebé haree ba kapasidade orsamentál entre billaun $1,8 no $1,9.
Notísia relevante: https://tatoli.tl/2025/06/13/tetu-preliminar-orsamentu-tinan-oin-entre-billaun-18-no-19/
Biban ne’e, Xefe Governu hato’o mós progresu ezekusaun OJE 2025 no ninia dezáfiu sira.
“Prezidente mós temi kona-ba ezekusaun primeiru trimestre nian, ne’ebé ha’u esplika uitoan. Ida-ne’e aas ne’e tanba sá? Baibain aas ne’e iha saláriu no vensimentu, fatin balun gasta liu tanba hatama tan ema karik? Kapitál dezenvolvimentu ne’e mak kusta uitoan, tanba iha problema oioin de’it ne’e mak ami atu korrije”, Xanana realsa.
Tuir portál Transparénsia Ministériu Finansa, to’o loron 17 Juñu 2025, ezekusaun OJE 2025 foin atinje 26% husi totál verba hamutuk billaun $2,6. Iha kompromisu sira $222.904.441,36, obrigasaun $158.627.306l74, atuál $521.569.131,90 no saldu $1, 714.069.354.
Notísia relevante: Ezekusaun OJE 2025 iha trimestre dahuluk atinje 24,2%
Jornalista: Nelson de Sousa
Editora: Maria Auxiliadora
