DILI, 29 Maiu 2025 (TATOLI) – Ministériu Finansa (MF) relata ezekusaun Orsamentu Jerál Estadu (OJE) 2025 iha trimestre dahuluk hamutuk 24,2% ba Komisaun C Parlamentu Nasionál ne’ebé trata Asuntu Finansa Públika.
Ministra Finansa, Santina Viegas Cardoso, hateten OJE 2025 ne’ebé Parlamentu aprova hamutuk billaun $2,6, ne’ebé daudaun kompromisu iha $222,915,180.17, obrigasaun $68,802,860.29, atuál ka reál ne’ebé sai ona $565.040,431.75 no saldu $1.759,282,788.03.
“Ita haree ba kolesaun reseita doméstika to’o agora $335.559.631,30 ne’ebé millaun $250 ne’e mai husi Rendimentu Sustentavel Estimadu. Ne’e duni reseita doméstika iha trimestre dahuluk kobre pur volta millaun $83. Ida-ne’e reprezenta pursentu 12,8 ne’ebé ita halo kolesaun”, Santina Cardoso informa iha audiénsia ne’ebé hala’o iha Parlamentu Nasionál, ohin.
Nia esplika razaun ezekusan iha trimestre dahuluk sei ki’ik tanba, tuir dadus istóriku ne’ebé iha, normalmente iha Janeiru-Marsu ezekusaun Governu nian ein-jerál la liu 20% ho razaun sira mak orsamentu aprova iha Novembru 2024 no Prezidente Repúblika promulga iha Dezembru 2024. cumi787
Aleinde ne’e, Ministériu Finansa tenta halo dekretu ezekusaun OJE 2025 no aprova mós iha Dezembru 2024.
“Hafoin dekretu ezekusaun hetan aprovasaun, ami labele halo kedas ezaminasaun, tanba foku hela ba konta 2024 nian. Entaun, ita foin hahú loke fali prosesu orsamentu 2025 nian iha 06 Janeiru. Ministériu Finansa hahú fó filafali tetu orsamentu ba kada ministériu, inklui fó asisténsia ba liña ministériu sira, liuliu disemina kona-ba regra dekretu ezekusaun nian”, esplika.
Depoizde ne’e, liña ministériu sira tenke hatama asinatura ema sira ne’ebé iha responsabilidade atu halo aprovasaun, nomós prosesu orsamentu husi kada instituisaun nian.
“Ita haree ezekusaun ein termu kategoria iha saláriu no vensimentu millaun $482 ba tinan tomak, maibé ba trimestre dahuluk gasta ona millaun $100-resin, katak saláriu hothotu nian ita prosesa”, dehan. motor138
Nia akresenta difikuldade seluk ne’ebé afeta ba ezekusaun sira ki’ik mak kapasidade pesoál sira iha liña ministeriál seidauk másima. wangi787
“Uluk sempre hateten katak ezekusaun ki’ik tanba sentraliza hotu iha MF, maibé daudaun hatudu katak mezmu desentraliza ona sei iha situasaun nafatin atu harii kapasidade pesoál sira, liuliu ne’ebé serbisu iha aprovizionamentu liña ministériu sira ne’ebé kaer sistema no aprova sistema, nun’e iha koñesimentu loloos tuir lei, atu iha ezekuasaun ne’ebé halo la’o tuir dalan legál”, dehan.
Iha sorin seluk, Prezidente Komisaun C, Cedelízia Faria dos Santos, hateten nafatin apresia serbisu Governu nian no husu Ministériu Finansa ezekuta OJE tuir planu no programa sira ne’ebé iha.
Notísia relevante: Komisaun C nota ezekusaun OJE 2025 iha trimestre dahuluk ki’ik
Jornalista: Arminda Fonseca
Editora: Maria Auxiliadora
