DILI, 20 Juñu 2025 (TATOLI)—Polísia Nasionál Timor-Leste (PNTL) liuhusi Diresaun Servisu Investigasaun detein suspeitu ho inisiál AGB tanba suspeitadu importa sasán kontra-bandu hanesan tabaku Joker marka “Pohon Sagu” kaixa (karton) 50 ho ilegalmente husi Indonézia mai territóriu Timor-Leste.
Sasán kontra-bandu sira-ne’e suspeitu AGB hatama iha kinta (19/6) tuku 04:00 madrugada husi fronteira Batugadé mai iha área Tibalau, Suku Guguleur, Postu Administrativu Maubara, Munisípiu Likisá. Nune’e, ekipa operasaun ne’ebé destaka iha área Likisá mak deteta no sasán sira-ne’e tula ho kamioneta ida. Na’in ba sasán mak AGB no kondutór ne’ebé lori mak sidadaun ho inisiál SS.
Ho nune’e, ekipa konjunta deteta katak sasán sira-ne’ebé iha karreta laran ne’e suspeitu sira falun ho roupa obralan, tan ne’e ekipa halo apreensaun kedas ho fraglante delitu no asegura kedas na’in ba sasán ne’e, kondutór inklui evidénsia sira hanesan tabaku Joker referidu, lori kedas bá iha Diresaun Servisu Investigasaun Komandu Jerál PNTL Kaikoli hodi submete ba prosesu identifikasaun.
Durante prosesu identifikasaun, Diresaun Servisu Investigasaun Kriminál detein kedas suspeitu referidu.
“Diresaun Servisu Investigasaun Kriminál rejista ona kazu ne’e ho NUC: 0182/25.PNSIK. Enkuantu, liberta kondutór SS fila bá uma, más detein suspeitu inisiál AGB iha sela detensaun Polísia Eskuadra Dom Aleixo hodi kumpri oras 72, depois sei aprezenta ba Ministériu Públiku hanesan na’in ba sasán hodi kontinua submete interrogatóriu dahuluk iha Tribunál,” sita husi komunikadu imprensa ne’ebé Tatoli asesu, sesta ne’e.
Entretantu, polísia halo apreensaun mós ba karreta ida-ne’ebé fasilita tula sasán kontra-bandu ne’e, inklui tabaku Joker kaixa 50. Sasán hirak-ne’e aseguradu ona iha Diresaun Servisu Investigasaun Kriminál nu’udár objetu krime hodi sustenta ba investigasaun.
Jornalista: Natalino Costa
Editór: Xisto Freitas da Piedade
