Instalasaun STJ sei hadi’ak kualidade desizaun judisiál
DILI, 07 Jullu 2026 (TATOLI)-Prokuradór-Jerál Repúblika (PJR), Nelson de Carvalho, destaka nesesidade Timor-Leste presiza harii ona Supremu Tribunál Justisa (STJ), tanba sei permite atu kria kondisaun hodi hadi’ak kualidade husi desizaun judisiál iha nivel justisa ein-jerál.
Nia hato’o kestaun ne’e iha aprezentasaun relatóriu anuál 2025 Ministériu Públiku (MP) nian iha reuniaun plenária Parlamentu Nasionál, ohin.
Durante aprezentasaun ne’e, nia rekomenda no hato’o perspetiva sira reforma nian ne’ebé konsidera esensiál ba futuru justisa no ba fortalesimentu institusionál MP nian.
“Instalasaun Tribunál Superiór sira-nian urjente atu kumpre saida mak prevee ona iha Lei Organizasaun Judisiária, ne’ebé aprova huosi ma fukun ida-ne’e iha fulan-Dezembru tinan-2021, ho instalasaun Supremu Tribunál Justisa nian no Tribunál Rekursu nian”, nia dehan.
Ba nia, medida ida-ne’e sei permite atu kria kondisaun hodi hadi’a kualidade husi desizaun judisiál iha nivel tribunál superiór sira no justisa ein-jerál.
Nelson de Carvalho informa ba deputadu sira katak, PJR hahú ona prosesu kona-ba instalasaun Prokuradoria Repúblika Rekursu nian, órgaun MP nian iha Tribunál Rekursu nian. Konsellu Superiór MP nian aprova ona regulamentu konkursu nian no iha tempu badak sei inisia konkursu públiku asesu nian ba kategoria ida-ne’e.
“Atu garante másima transparénsia no imparsialidade, júri sei kompostu husi majistradu sira topu karreira MP nian husi país sira ne’ebé Timor-Leste mantein relasaun no akordu sira kooperasaun nian ne’ebé partilla ho ita matrís jurídika hanesan”, nia adianta.
Notísia relevante: Aban, Komisaun halo abertura aplikasaun ba Juíz STJ no TR
Jornalista: Nelson de Sousa
Editora: Maria Auxiliadora
