DILI, 02 Jullu 2025 (TATOLI) – Sekretaria Estadu Kooperativa (SEKoop) haruka membru Kooperativa Multisetorál Budahanra, husi Likisá, no produtór bani-been seluk hamutuk na’in-ualu atu bá aprende diretamente kona-ba prosesu haki’ak no prodús bani-been husi empreza Bali Honey Madu, iha Agostu no Setembru tinan ne’e.
Diretór-Jerál SEKoop, Olderico Lopes, dehan atividade ida-ne’e hola parte iha asinatura memorandu entendimentu (MoU) ne’ebé SEKoop halo ona kontaktu ho empreza.
“Ami hato’o ona pedidu ida ba empreza Bali Honey Madu, fulan ne’e la’e Agostu atu asina memorandu ida para sira mai halo peskiza bá fatin sira iha munisípiu sira atu haree fatin ida ne’ebé iha poténsia atu haki’ak bani”, Olderico Lopes dehan ba Tatoli, ohin.
Nia salienta bainhira ekipa identifika hotu fatin potensiál sira mak tékniku sira husi SEKoop sei bá fali tuir formasaun sobre maneira haki’ak bani, nune’e mai fali sai Training of Trainer (ToT) ba komunidade ne’ebé haki’ak bani ne’e.
“Bani la naran haki’ak, maibé tenke iha maneira hanesan balu kuda ai-horis baibain, ai-funan entaun presiza koñesimentu no abilidade téknika ne’ebé apropriada. Tanba ne’e, ami hakarak kooperativa sira aprende diretamente husi Bali Honey Madu”, nia hateten.
Tuir nia, liuhusi kooperasaun ida-ne’e, SEKoop espera katak produsaun bani-been lokál iha Timor-Leste bele hadi’ak tantu iha kualidade komu volume, nune’e mós kria oportunidade ekonómika foun ba komunidade rurál.
Responsavel ne’e dehan iha Agostu no Setembru empreza Bali Honey Madu sempre halo produsaun ba bani-been, nune’e oportunidade haruka membru kooperativa sira atu bá aprende ho sira.
Tuir Sekretáriu Estadu Kooperativa nia planu no prioridade durante mandatu mak hakarak transforma kooperativa produsaun agríkola mak hanesan Bafo Kayrala, produsaun karau susubeen, bani-been, mina-nuu, mina-kamii no jus abakate.
Notísia relvante: SEKoop koopera ho Bali Honey Madu halo produsaun bani-been iha Timor-Leste
Jornalista: Arminda Fonseca
Editora: Maria Auxiliadora
