iklan

EKONOMIA, HEADLINE

SEKoop koopera ho Bali Honey Madu halo produsaun bani-been iha Timor-Leste

SEKoop koopera ho Bali Honey Madu halo produsaun bani-been iha Timor-Leste

Ilustrasaun bani-been. Imajen/Espesial

DILI, 19 juñu 2024 (TATOLI)—Sekretaria Estadu Kooperativa (SEKoop) daudaun ne’e koopera ona ho empreza Bali Honey Madu atu halo produsaun bani-been iha Timor-Leste.

Diretór Jerál SEKoop, Olderico Lopes, hateten, SEKoop nia planu prioridade ida-ne’ebé atu halo durante mandatu maka halo produsaun bani-been iha rai-laran.

“Ita-nia Sekretáriu Estadu Kooperativu nia planu prioridade durante mandatu ne’e hakarak transforma kooperativa produsaun agríkola neen mak hanesan Bafo Kayrala, halo produsaun karau susu-been, bani-been, mina-nuu, mina-kamí, no jus abokate, entaun bani-been nian ita koopera ho empreza Bali Honey Madu,” Olderico Lopes, informa ba Agência Tatoli, iha ninia knaar fatin, Acait, kuarta ne’e.

Notísia relevante : Produtu lokál Suku Faturilau mak Bani-been

Daudaun ne’e ekipa téknika husi SEKoop halo hela estudu komparativu iha empreza nia fatin iha Bali atu haree maneira hakiak bani hotu no sei mai ho ekipa husi empreza hodi identifika fatin sira iha Timor, ne’ebé mak iha poténsia atu hakiak bani.

“Bainhira identifika hotu ona mak ita-nia tékniku sira sei ba fali tuir formasaun maneira hakiak bani, nune’e mai fali sai Training of Trainer (ToT) ba komunidade ne’ebé sei hakiak bani ne’e, tanba bani ne’e ita la naran hakiak maibé tenke iha maneira kuda nia ai-fuanan,” nia tenik.

Ida-ne’e hanesan planu prioridade ne’ebé molok mandatu ramata planu sira ne’e sei ezekuta. Daudaun SEKoop halo kultivasaun Bafo Kay Rala iha fatin-fatin.

“Tanba ita hakarak kresimentu ekonómiku ne’e bele mai husi família uluk lai molok kontribui ba ekonomia nasionál nian,” nia dehan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!