DILI, 13 Juñu 2026 (TATOLI)—Jogadór suplente selesaun nasionál Kanada, Cyle Larin, sai eroi ba nia nasaun bainhira salva derrota husi Bósnia nia liman iha minutu 78, hodi hatur rezultadu ba 1-1 iha jogu Kopa Mundiál FIFA 2026 Grupu B ne’ebé realiza iha Estádiu Toronto, sábadu madrugada oras Timor-Leste.
Husi rezultadu ne’e lori nasaun rua tenke fahe pontu ba malu ida-ida iha jogu dahuluk guru B nian.
Jogu ne’ebé lidera husi árbitru Facundo Tello husi nasaun Argentina ne’e, hatudu momoos katak jogadór husi nasaun rua lansa kedan kontra no atake ba malu tuir têkniku no abilidade nasaun ida-idak nian.
Uma-na’in Kanada hahú ho presaun liuhusi kontra-atake ne’ebè maka’as oinsá atu hamonu mentalidade adversáriu bainaka nian, maibé ekipa bainaka la fó nia frakeza hodi luta kontra atake ne’ebé Kanada halo.
Bósnia ameasa ona dezde minutu dalima. Jovo Lukic nia kabesa husi sentru kaixa penalidade semo luan luan ba parte karuk dook husi guarda-rede.
Jogu sai manas liután bainhira pasa ida-ne’ebé ladún di’ak husi Kanadá hamosu kontra-atake lalais ida hosi Bósnia iha minutu 11. Amar Memic halai sai husi parte karuk maibé hetan soe husi Alistair Johnston iha atake maka’as ida. Johnston hetan kartaun kinur bainhira halo erru hodi hamate bola.
Bósnia hetan vantajen iha minutu 21, husi kantu ida, jogadór Memic nia kruzamentu dezvia husi jogadór Sead Kolasinac ho kabesa, ne’ebé Jovo Lukic utiliza oportunidade kabesa bola ba rede.
Maske sofre ona golu ida husi adversáriu, Kanadá iha oportunidade iha minutu 33. Jogadór Tanitoluwa Oluwaseyi kontrola bola iha parte loos kaixa penalidade nian hafoin manán duelo ida ho defeza bósniu ida. Maibé nia xutu la kona iha alvu.
Kanadá kontinua halo presaun ba Bósnia, maibé série pasajen sira-ne’ebé ladi’ak no xutu sira halakon atake. Primeira parte ramata ho Bósnia mak provizória lidera jogu.
Hakat ba segunda parte, jogu sai manas liután halo ema ema rihun ba rihun ne’ebé asiste direta jogu ne’e admira.
Kanada hanesan uma-na’in la fó nia pontu fraku maibé kontinua halo kontra-atake maske sofre hela golu ida. Jogadór sira Liam Millar tenta halo jogu ho individu maibé la konsege ultrapasa defeza Bósnia.
Ho jogu ne’ebé laiha mudansa, iha minutu 75 treinadór Kanada deside dada sai jogadór Jonathan David hodi hatama fali Cyle Larin.
Estratejia ne’e fó duni vantajen ba Kanada. Basá iha minutu 79, Cyle Larin, konsege lees duni rede Bósnia nian hodi muda rezultadu ba 1-1.
Entretantu, jogu segundu husi grupu B iha oras tuku 10h00 otl, Estadu Unidu Amrika (EUA) kontra Paraguay iha Estádiu Los Angeles, Inglewood.
Ekipa nasionál futeból Bósnia no Herzegovina nian reprezenta Bósnia no Herzegovina no kontrola hosi Asosiasaun Futeból Bósnia no Herzegovina nian. Ekipa ne’e nunka mosu iha Tasa Mundiál ka Kampeonatu Europa.
Kanada (4-4-2); (16) Maxime Crepeau, (2) Alistair Johnston, (4) L. de Fougerolles, (13) D. Cornelius, (22) R. Laryea, (17) Tajon Buchanan, (7) Stephen Eustaquio, (8) Ismael Kone, (11) Liam Millar, (10) Jonathan David, (12) Tani Oluwaseyi.
Treinadór: Jesse Alan Marsch
Bósnia-Herzegovina
(25) J. Lukić, (10) Ermedin Demirovic, (15) A. Memić, (6) Benjamin Tahirovic, (13) Ivan Basic, (20) E. Bajraktarević, (5) Sead Kolasinac, (4) T. Muharemović, (18) N. Katić, (7) Amar Dedic, (1) N. Vasilj
Treinadór : Savo Milošević
Jornaliata : Hortêncio Sanchez
Editór : Cancio Ximenes
