DILI, 03 Jullu 2025 (TATOLI)—Autoridade Administrasaun Munisipál (AAM) Baukau durante trimestrál daruak ezekuta ona orsamentu jerál Estadu (OJE) tinan 2025 hamutuk pursentu 44.2.
Sekretáriu Munisipál Asuntu Administrasaun no Finansa, Juvinal Daniel Filipe Belo, esplika mezmu taxa ezekusaun seidauk atinje tuir alvu maibé AAM iha inísiu fulan ne’e sei ezekuta tan orsamentu hodibele to’o pursentu 50.
“Ita sei falta pursentu neen atu to’o alvu pursentu 50 ba ezekusaun trimestrál daruak. Maibé, semana ne’e rAmata ita sei kumpre to’o alvu,” Sekretáriu Munisipál Asuntu Administrasaun no Finansa Baukau informa ba TATOLI liuhosi telefónema, kinta ne’e.
Juvinal hatutan maski iha portál transparénsia relata ezekusaun Munisípiu Baukau 44.2% ne’ebé akumula ona ho obrigasaun maibé realidade loloos taxa ezekusaun atinje ona pursentu 56 tanba akumula transferénsia kona-ba kompromisu ne’ebé autoridade hala’o ho kompañia sira tanba rejistu ona iha sistema.
Enkuantu, kona-ba planu ezekusaun ba trimestrál dalatoluk, AAM sei foku ezekuta fundu transferénsia públika ligada ba atividde Programa Nasionál Dezenvolvimentu Suku (PNDS), subsidiu ba membru Konsellu Suku no merenda eskolár ne’ebé prevee orsamentu hamutuk $7.455.580.
“Ita sei foku ba ezekusaun ba atividade tolu referida iha trimestrál datoluk nune’e bele atinje pursentu 70,” Juvinal Belo akresenta.
Autoridade Baukau ba tinan-2025 hetan alokasaun orsamentu hamutuk $12.437.747 fahe ba kategoria haat hanesan saláriu no vensimentu $2.812.445, bens no serbisu $772.510, transferénsia públika $7.455.580 no kapitál dezenvolvementu hamutuk $1.407.212.
Tuir dadus husi portál transparénsia Ministériu Finansa iha loron kinta (03/07/2025) ne’ebé TATOLI asesu, totál ezekusaun orsamentu Munisípiu Baukau ba trimestrál daruak nian atinje pursentu 44.2 korreponde ba kompromisu $1.530.371,93, obrigasaun $95.121,80, atuál $5. 408.199,64. Enkuantu, saldu oras ne’e hela $5.404.063,63.
Jornalista: Natalino Belo
Editór: Xisto Freitas da Piedade
