DILI, 04 Jullu 2025 (TATOLI) – Kada tinan Timor-Leste selebra loron kooperativa tuir data internasionál nian, tanba ne’e Sekretáriu Estadu Kooperativa (SEKoop), Arsénio Pereira, hakarak estabelese data ida ne’ebé sai hanesan Loron Kooperativa Nasionál.
Nia hateten importante tebes atu iha loron nasionál ida hodi selebra movimentu kooperativa, tanba loron ne’e atu rekoñese esforsu kooperativa sira iha dezenvolvimentu nasionál.
Tuir nia, selebrasaun Loron Mundiál Kooperativa fó oportunidade atu reflete no rekoñese kontribuisaun kooperativa. “Ami hakarak deside data nasionál ida hodi rekoñese serbisu setór kooperativu nian ne’ebé kontribui ba dezenvolvimentu ekonomia nasaun nian”Arsénio Pereira hateten iha ámbitu selebrasaun Loron Internasionál Kooperativa, iha salaun Katedrál Vila Verde.
Nia dehan kontribuisaun kooperativa sira importante tebes, no Governu sei kontinua fó apoiu fasilita liuhusi formasaun no finansiamentu, atu kooperativa sira bele dezenvolve an bele no fó kontribuisaun ba dezenvolvimentu nasionál.
Sekretáriu Estadu ne’e fó ezemplu hanesan setór kooperativa iha agrikultura, hanesan kooperativa ne’ebé prodús batar “Bafo Kay Rala” atu fornese ba Programa Merenda Eskolár.
Nia subliña serbisu kooperativa la’ós buat foun, tanba desde beiala sira-nia tempu sira serbisu grupu maski la fó naran kooperativa. Agora, nia dehan, tempu atu kooperativa sira halibur malu hamutuk, halo mudansa ba Timór.
SEKoop rejista ona kooperativa primária 245, no husi ne’e iha federasaun kooperativa hitu, halibur ema rihun 39 ho kapitál akumuladu to’o millaun $20,4.
Tuir lei, koonperativa sira bele sai hanesan ajénsia finaseira tanba iha kapitál rasik. Governante ne’e konsidera hanesan progresu ida, tanba ema-nia envolvimentu iha kooperativa sei aumenta kada loron.
Loron Internasionál Kooperativa selebra kada tinan iha sábadu dahuluk fulan-Jullu, dezde tinan 1923. Loron ne’e uza atu sensibiliza públiku kona-ba importánsia kooperativa sira. Iha tinan ne’e, sei selebra iha loron 05 Jullu ho tema “Kooperativa Konstrui Mundu Ida Di’ak Liu”.
Jornalista: Arminda Fonseca
Editora: Maria Auxiliadora
