Swedia halakon Tunisia ho festa golu 5-1 iha Kopa Mundiál 2026
DILI, 15 Juñu 2026 (TATOLI)—Selesaun Nasionál Swedia selebra sira-nia vitoria dahuluk iha Kopa Mundiál 2026 hafoin halakon adversáriu Tunisia ho festa golu 5-1 iha faze grupu F, ne’ebé hala’o iha Estádiu Monterrey, Guadalupe, León Baru, segunda meiudia ne’e.
Jogu entre ekipa rua lidera husi Árbitru Glenn Nyberg husi nasaun Swedia. Johu hahú, jogadór sira lansa kedan kontra-atake ba malu atu hadau vitória hodi hatama golu.
Jogu la’o ho intesidade maka’as, Estádiu hanesan nakonu de’it ho adeptu sira-nia lian hakilar. Swedia hetan vantajen iha minutu hitu liuhusi Yasin Ayari, konsege hatama golu ba baliza Tunisia nian hodi muda rezultadu ba 1-0.
Golu ne’e halo jogu sai manas liutan, Tunisia la nonook, sira mós lansa atake liuhusi pasa bola husi ain ba ain, maibé Swedia hamate tutuir tatíka ne’ebé Tunisia prepara atu prodús golu hodi halo empata jogu ne’e.
Ho velosiade jogu ne’ebé sa’e maka’as, Swedia lansa presaun maka’as, to’o ikus fó duni oportunidade ba Swedia hodi aumenta sira-nia vantajen ba 2-0 liuhusi sira-nia avansadu estrela, Alexander Isak. Nia simu bola husi Viktor Gyokeres, Isak halai tun ba lina karuk no lansa sutu baixu ida-ne’ebé halo guarda rede Tunisia Abdelmouhib Chamakh labele salva.
Maske sofre ona golu rua, Tunisia la lakon esperansa, kontinua luta, nune’e iha minutu 43, sira konsege hamenus sira-nia sofrimentu golu bainhira jogadór Omar Rekik responde golu ida ba Swedia hodi muda rezultadu ba 2-1.
Husu rezultadu ne’ebé iha mantein to’o jogu primeira parte termina ba deskansa minutu 15 hafoin luta fali iha minutu segunda parte.
Tunísia selebra de’it sira-nia golu iha primeira parte, hafoin tama ba segunda parte Swedia mak selebra golu to’o ramata.
Jogu la’o ho velosidade maka’as, Swedia la fó tempu naruk ba Tunísia atu halo golu tan iha minutu daruak.
Ho jogu ne’ebè manas husi liña ba liña, Swedia kontinua halo presaun iha Tunisia nia área defeza nian. Iha minutu 59, Viktor Gyökeres marka golu datoluk ba Swedia. Nia aproveita didi’ak bola ne’ebé pasa husi meiu-kampu no konsege fura guarda-rede Mohamed Kamel Chamekh.
Swedia kontinua domina jogu. Iha minutu 84, Mattias Svanberg aumenta tan golu ho rezultadu 4-1. Swedia hahú loke liras no loko an ho rezultadu ne’ebéxsave metin ona, ikus mai jogadór Yasin Ayari marka golu ikus iha minutu 90+6. Golu ne’e save kedan vitória boot 5-1 ba ekipa Eskandinávia nian.
Ho vitória ne’e, Swedia sai lider temporáriu Grupu F Kopa Mundiál 2026. Sira halibur pontu tolu (3) no hatudu forsa ofensiva makaas ho golu lima (5). Enkuantu Tunísia sei iha pozisaun ikus Grupu F.
Vitória 5-1 hasoru Tunísia fó sinál pozitivu ba Swedia iha sira nia kampaña Grupu F nian. Alexander Isak, Viktor Gyökeres no Yasin Ayari hatudu katak liña ataka Swedia nian prontu atu kompete iha Kopa Mundiál 2026.
Ekipa Swedia (3-4-1-2)
(23) Kristoffer Nordfel, (2) G. Lagerbielke, (4) Isak Hien, (3) V. Lindelof, (21) Anthony Bernhardsson, (18) Yasin Ayari, (16) Jesper Karlström, (5) Gabriel Gudmundsson, (10) Benjamin Nygren, (9) Alexander Isak, (17) Viktor Gyökeres.
Ekipa Tunisia (4-2-3-1)
(1) Mohamed Kamel Chamekh, (21) Mohamed Ben Hmida, (4) Omar Rekik, (3) Montassar Talbi, (20) Yan Valery, (17) Ellyes Skhiri, (13) Rani Khedira, (2) Ali Abdi, (10) Hannibal Mejbri, (25) Anis Slimane, (8) Elias Saad.
Jornalista : Hortêncio Sanchez
Editór : Cancio Ximenes
