VIKEKE, 14 Jullu 2025 (TATOLI)—Sekretáriu Estadu Kooperativa, Arsénio da S. Pereira dezafia Grupu Hisik Kosar ba Moris Di’ak (HKMD) labele haki’ak fahi, maibé tenke dezenvolve aan sai kooperativa iha Suku Bibleo.
Sekretáriu Estadu Kooperativa hato’o asuntu ne’e bainhira vizita grupu HKMD ne’ebé hetan fundu transferénsia públika hodi haki’ak fahi, iha Suku Bibleo, Postu Administrativu Vikeke Vila, Munisípiu Vikeke, Segunda ne’e.
“Ohin grupu ida-ne’e hahú ona atividade haki’ak fahi. Bá-oin Sekretaria Estadu Kooperativa (SEKOOP) sei akompaña no fasilita tan hodi sai kooperativa tanba grupu ida-ne’e mak dezenvolve aan sai kooperativa sei iha ninia estatutu própriu. Tan ne’e, ha’u ko’alia buat ne’ebé ha’u halo ona,” Arsénio dehan iha serimónia inaugurasaun fahi luhan, iha Suku Bibleo.
Tuir governante ne’e katak komunidade Bibleo iha inisiativa di’ak tanba bele organiza malu harii grupu hodi haki’ak fahi no konsideradu ida-ne’e sai ezemplu ba komunidade ne’ebé hela iha área remota.
Iha fatin hanesan, Xefe Suku Bibleo, Moises A. Da Costa Pinto husu SEKOOP nafatin fó apoiu ba komunidade Suku Bibleo hodi hasa’e produsaun sira tanba Suku Bibleo poténsia ba setór agrikultura.
Aleinde ne’e, Reprezentante Koordenadór Grupu Hikis Kosar Ba Moris Di’ak, Domingos Alves Amaral hato’o agradesimentu ba SEKOOP ne’ebé apoia ona fundu ba grupu hodi konstrui fahi luhan atu haki’ak fahi.
“Ami hato’o agradesimentu ba SEKOOP tanba fó ona fundu ba ami konstrui fahi luhan hamutuk kuartu 10 no uma. Totál orsamentu ne’ebé ami simu husi SEKOOP hamutuk $3.769. Ami-nia esperansa bá-oin sei dezenvolve haki’ak fahi sai boot,” nia hato’o.
Grupu Hikis Kosar Ba Moris Di’ak harii iha tinan 2025 ho totál membru hamutuk na’in-13 ne’ebé haki’ak fahi lokál.
Iha vizita ne’e, Sekretáriu Estadu Kooperativa SEKOOP ofisialmente inaugura fahi luhan ne’ebé Grupu Hikis Kosar Ba Moris Di’ak harii ho medida 10×6 no partisipa husi autoridade lokál no hetan partisipasaun másima husi komunidade Suku Bibleo.
Jornalista: Vitorino Lopez da Costa
Editór: Xisto Freitas da Piedade
