Armazein nasionál Dili iha stock foos tonelada rihun 2-resin
DILI, 18 Juñu 2026 (TATOLI) – Prezidente Sentru Lojístiku Nasionál (CLN, sigla portugés), António de Araújo Soares, informa katak armazein nasionál iha stock foos tonelada rihun 2-resin no hare-kulit tonelada 1.700.
Nia dehan relasiona ho funu iha Médiu Oriente medida ne’ebé Governu foti liga ho rezerva estratéjia Estadu nian, foin lalais iha diskusaun Orsamentu Retifikativu (OR) polítiku sira levanta no deside aloka tan osan millaun $5 haruka mai iha CLN atu haree no halo tan akizisaun foos hodi reforsa stock iha armazein ne’e.
“Entaun, ho orsamentu ne’ebé Governu aloka mai iha CLN ne’e ita haree se situasaun ne’e presiza duni, ita sei halo intervenasaun. Foos ne’ebé daudaun iha armazein ne’e mós konta hotu ho foos ne’ebé foin lalais ita halo akizisaun tonelada 1.584. Sira ne’e hamutuk mak tonelada rihun 2-resin ne’e”, António de Araújo Soares hateten ba Tatoli, ohin.
Nia dehan kona-ba hare-kulit ne’ebé CLN sosa ne’e mai husi Bobonaru, Kovalima, Ermera, Manufahi, Manatutu, Baukau, no Vikeke.
“Foos ne’ebé iha, ita mós durante ne’e halo intervasaun ba iha merkadu munisípiu hothotu, hela de’it Oekusi mak seidauk. Foos ne’ebé ita fa’an 10kg ho marka MCAE folin $4,50 kada karon”, nia dehan.
Foos ne’ebé CLN halo intervensaun iha merkadu ne’e depende ba pedidu husi munisípiu, balun husu tonelada 84, balun 50 no seluk 60.
Kona-ba produtu sira hanesan koto, fore-mungu, Prezidente CLN haktuir katak daudaun sira-nia parte la sosa produtu hirak ne’e tanba haree ba esperiénsia antes ne’e Governu sosa mai rai de’it to’o sai aat tiha.
“Daudaun ita foku mak hare-kulit de’it, tanba produtu hanesan koto, fore-mungu sira ne’e orgániku, entaun ita sosa mai rai kle’ur uitoan sai aat. Tanba ne’e, ita la sosa tan, la’e ita fó prejuízu ba Estadu”, nia realsa.
Notísia relevante: CLN iha foos tonelada 1.200
Jornalista: Arminda Fonseca
Editora: Maria Auxiliadora
