DILI, 20 Agostu 2025 (TATOLI)—East Timor Trading (ETT) Group liuhusi nia dezenvolvedór Zona Industriál Negósiu Deskoberta (DBIZ, sigla portugés) retira ona nia proposta investimentu husi projetu industriál iha Timor-Leste, ne’ebé tuir planu sei dezenvolve iha faze tolu.
Desizaun ne’e fó sai liuhusi pájina ofisiál ETT iha 08 Agostu 2025, ne’ebé hateten katak mudansa ne’e hanesan rezultadu husi revizaun kle’an ida ba empreza nia prioridade estratéjika no reorientasaun ida husi nia foku investimentu nian.
“Hafoin konsiderasaun ho kuidadu no revizaun ba ami-nia prioridade estratéjiku sira, dezenvolvedór sira husi Zona Industriál Negósiu Deskoberta, foti ona desizaun difísil hodi hasai investimentu husi proposta projetu industriál ho faze tolu, ho totál millaun $100,” referidu nota ofisiál ne’ebé Ajénsia TATOLI asesu, Kuarta ne’e.
Notísia relevante : Prezidente ETTG konsidera Timor-Leste presiza trata empreza hanesan hodi atrai investimentu sustentável
ETT nu’udar investidór ida-ne’ebé komprometidu no iha interrese ba dezenvolvimentu Timor-Leste nian, ne’ebé sira-nia desizaun atu la kontinua dezenvolvimentu DBIZ nian reflete reorientasaun ida husi foku ba investimentu no oportunidade sira ne’ebé aliña di’ak liu ho objetivu ba tempu naruk, enkuadramentu operasionál no valór orientadór sira.
“Ami fiar katak pasu ida-ne’e nesesáriu atu asegura sustentabilidade ba ami-nia negósiu ne’ebé eziste, no atu permite atividade sira seluk iha futuru. ETT nia mudansa iha diresaun investimentu hodi garante sustentabilidade negósiu ne’ebé nia harii durante liu dékada rua,” Empreza esplika.
Maski la kontinua projetu DBIZ, maibé ETT afirma ninia kompromisu ba operasaun durante tinan 23 iha Timor-Leste no empreza ne’e mós hato’o nia apresiasaun ba parte interresada sira hotu, partikularmente ba prosesu submisaun Akordu Investimentu Espesiál liuhusi TradeInvest iha tinan tolu ikus ne’e.
“Ami mós dezeja ba Governu no povu Timor-Leste susesu kontinua iha sira nia perkursu dezenvolvimentu ekonómiku durante tinan ida ne’ebé krusiál ba nasaun, no ami hein atu partisipa iha inisiativa sira iha futuru ne’ebé sei haburas kresimentu inkluzivu no mutuamente benefisiál,” Empreza fó sai.
Ba kestaun ne’e, jornalista Ajénsia TATOLI tenta halo entrevista ho Jerente ETT, Milena Pires, iha loron 19 Agostu 2025, maibé rejeita atu fó komentáriu.
Antes ne’e, ETT Group anunsia ona planu boot atu estabelese parke industriál iha rai ektare 7 iha Fomentu II, ho investimentu fazeada millaun $12 to’o $15 iha faze dahuluk, millaun $32 iha faze daruak no millaun $55 iha faze datoluk.
Projetu ne’e iha alvu atu kria empregu rihun ba rihun, tuir ambisaun empreza nian atu absorve to’o 1% husi totál populasaun Timor-Leste nian iha setór traballu.
Empreza ne’e harii husi Sakib no Neelofer Awan iha 2002, ne’ebé hala’o ona papél signifikativu iha dezenvolvimentu ekonómiku nasionál liuhosi retallu, ospitalidade, distribuisaun, no inisiativa sosiál sira. Liuhusi Fundasaun Deskoberta, sira mós estabelese ona eskola pré-eskolár oioin nu’udar parte ida hosi sira nia responsabilidade sosiál korporativa.
Nu’udar rekoñesimentu ba kontribuisaun sira ne’e, Prezidente Repúblika no laureadu Prémiu Nobel da Pás, José Ramos-Horta entrega Medalla Méritu ba Neelofer Awan, ko-fundadór no Diretór Administrativu Komérsiu Timór Lorosa’e nian, iha Outubru 2024.
To’o ohin loron, ETT sai nafatin nu’udar investidór privadu ida ne’ebé iha influénsia boot liu iha Timor-Leste, ho funsionáriu na’in-200 resin no kontribuisaun fiskál hamutuk millaun $55 durante dékada ikus ne’e.
Jornalista : Arminda Fonseca
Editora : Julia Chatarina
