EKONOMIA, HEADLINE

Prezidente ETTG konsidera Timor-Leste presiza trata empreza hanesan hodi atrai investimentu sustentável

Prezidente ETTG konsidera Timor-Leste presiza trata empreza hanesan hodi atrai investimentu sustentável

Atividade iha Portu Tibar,sesta (16/06/2023). Imajen Tatoli/Antonio Daciparu

DILI, 12 juñu 2024 (TATOLI)—Fundadór no Prezidente East Timor Trading Group (ETTG), Sakib Awan, konsidera Timor-Leste presiza trata empreza hanesan hodi atrai investimentu sustentável tanba Timor-Leste iha potensialidade barak hodi halo investimentu.

Fundadór no Prezidente East Timor Trading Group. Sakib Awan. Imajen/ETTG

“Atu hasa’e konfiansa ba investidór sira no atrai investimentu sustentável sira, Timor-Leste tenke asegura kondisaun konkorénsia ekitativa nian iha ne’ebé empreza sira hetan tratamentu hanesan, transparente no justu. Atu hasoru dezafiu prinsipál sira hanesan ezekusaun kontratu, lei propriedade, no kustu eletrisidade ne’e esensiál tebes atu fornese negósiu seguransa no fó apoiu nesesáriu ba empreza sira atu hetan prosperidade,” Sakib Awan, hato’o perspetiva ne’e liuhusi nota ne’ebé Agência Tatoli asesu, kuarta ne’e.

Nia nota, Timor-Leste hanesan nasaun ida-ne’ebé riku iha rekursu naturál sira, ne’ebé presiza dudu husi juventude no forsa traballu vibrante sira hodi hamriik besik kreximentu ekonómiku transformativu.

“Timor-Leste nakonu ho rekursu naturál barak, ne’ebé fó oportunidade signifikante atu dezenvolve setór agrikultura sustentável no promove nasaun ne’e hanesan destinu turístiku úniku ida. Identifika ai-horis ho valór a’as ne’ebé apropriadu ba kultivasaun iha terrenu-monteñozu nian, hamutuk ho inisiativa agríkola estratéjika sira sei hasa’e kreximentu ekonómiku no seguransa ai-han,” nia akresenta.

70% husi populasaun iha idade serbisu produtivu, Timor-Leste aprezenta oportunidade úniku ida ba empreza no investidór sira ne’ebé buka fronteira foun ba dezenvolvimentu. Timor-Leste nia klasifikasaun a’as liu iha Sudeste Aziátiku kona-ba Índise Direitu Polítiku no Liberdade Sivíl nu’udar sinál estabilidade no prosperidade iha rejiaun ne’e. Timor-Leste nu’udar rai ida-ne’ebé iha poténsial boot ne’ebé seidauk explora didi’ak.

Notísia relevante : East Timor Trading Group organiza eventu “Japan Night” iha Timor Plaza

Prezidente ETTG dehan, haree Timor-Leste riku ho rekursu naturál presiza hamutuk ho viziñu sira, liu-liu Austrália bele harii rejiaun ida-ne’ebé estável no ekonomia viável ne’ebé fó benefísiu ba parte.

“Ita-nia forsa traballu ne’ebé joven ho enerjétiku no benefísiu kustu signifikativu, ne’ebé ita oferese ba empreza sira kria ambiente inkomparável ba parseria transformativu no investimentu sira,” nia hateten.

Maski iha diferensa boot iha partisipasaun empregu 73% iha Territóriu Norte Austrália nian no 30% iha Timor-Leste iha poténsia boot ba kresimentu. Nasaun nia forsa traballu ne’ebé joven ho kapasidade prontu ba engajamentu no dezenvolvimentu, oferese oportunidade boot ba empreza internasionál sira atu kontribui no hetan benefísiu husi kresimentu ida-ne’e.

“Diferensia signifikante iha PIB per kapita GDP – $100.000 iha Territóriu Norte kompara aserka $1.900 iha Timor-Leste, ne’ebe ki’ik liu iha Sudeste Aziatiku, nune’e potensiál ba parseria no investimentu ekonómiku transformativu sira atu dudu dezenvolvimentu substansiál,” Sakib Awan hato’o.

Timor-Leste nia kustu traballu ne’ebé ki’ik tebes aprezenta vantajen estratéjiku ba empreza sira. Ho kustu traballu ne’ebé kompostu husi 20% husi despeza operasionál, kompara ho 63% iha Australia, Timor-Leste oferese forsa traballu ida ne’ebé asesivel ne’ebé suporta kreximentu sustentavel. Saláriu ba traballu ne’ebé la kualifikadu halo Timor-Leste sai nu’udar destinu atrativu ba empreza sira ne’ebé buka atu minimiza despeza sira no asegura saláriu justu ba funsionáriu sira.

Esforsu kolaborativu entre Governu Timor-Leste no Australia, inklui rejime aprendizajen ne’ebé finansia husi Governu no estabelesimentu ba tratadu impostu duplu, sei halo Timor-Leste atrativu liu hodi halo negósiu.

Konfiansa no kooperasaun iha nível polítiku no komunidade importante tebes atu hametin estabilidade no seguransa rejionál iha Indo-Pasifiku. Konfiansa no respeitu entre Australia, Timor-Leste, ne’ebé eziste tia ona, no parseiru rejionál sira, fó baze ba fundasaun sólidu ba esforsu kolaborativu sira atu bele hetan prosperidade no dezenvolvimentu hamutuk.

“Aliña polítika Governu nian ho objetivu negósiu nian sei asegura katak laiha nasaun ida-ne’ebé iha kotuk atu buka unidade no progresu rejionál sira,” Sakib Awan tenik.

Estabelese prezensa negósiu Australia nian ne’ebé forte iha Timor-Leste ne’e importante tebes atu dudu kreximentu ekonómiku no diversifikasaun. Konsellu Negosiu Timor-Leste Austrália (Timor-Leste Australia Business Council) ida-ne’ebé efetivu iha Dili sei fó apoiu no advokasia esensiál ba empreza Australia sira ne’ebé halo sira-nia atividade iha Timor-Leste. Aleinde ne’e, estabelesimentu Timor-Leste nian loja balkaun úniku ida ba iha empreza Austrália, iha Darwin sei fasilita fasilidade komunikasaun fasil liu no kolaborasaun entre nasaun rua ne’e.

Intelligensia Artificial (IA) iha potensiál atu revolusioniza edukasaun, kuidadu saúde no setór sosiedade oin-oin iha Timor-Leste. Investimentu proativu no utilizasaun estratéjiku teknolojia IA nian bele fó kbiit ba individuál sira, hasa’e rezultadu aprendizajen, no hadi’a servisu saúde nian, dudu dezenvolvimentu ekonómiku no progresu sosiál sira.

Tasi Timor-Leste nian, nakonu ho biodiversidade ne’ebe a’as liu iha planeta ne’e, oferese oportunidade inkomparavel ba sira ne’ebeé entuziazmu ba eko-turizmu no luku iha tasi laran. Prátika peska ne’ebé responsável no inisiativa aquakultura nian sei garante viabilidade rekursu tasi nian ba tempu naruk, hodi fornese rendimentu estável no seguransa ai-han ba populasaun iha nasaun ne’e.

Timor-Leste besik ba transformasaun ida ne’ebé boot loos. Ho apoiu husi empreza internasionál sira, investidór sira, no parseiru rejionál sira, nasaun ne’e bele alkansa dezenvolvimentu sustentável no kria futuru ida-ne’ebé naroman liu ba povu Timor-Leste.

Jornalista     : Arminda Fonseca 

Editora          : Julia Chatarina

iklan
iklan

Leave a Reply

iklan
error: Content is protected !!