iklan

NASIONÁL, EKONOMIA, DILI, HEADLINE

East Timor Trading Group organiza eventu “Japan Night” iha Timor Plaza

East Timor Trading Group organiza eventu “Japan Night” iha Timor Plaza

Imajen/Jesuína Xavier

DILI, 11 novembru 2023 (TATOLI) – East Timor Trading  Group organiza eventu  “Japan Night” ho atividade  konsertu  múzika no gastronomia japoneza no lokal, arte kempo iha Timor Plaza.

Iha okaziaun ne’e, Embaixador Japaun iha Timor-Leste, Kimura Tetsuya, agradese apoiu East Timor Trading no Timor Plaza hodi organiza no apoiu atividade hirak ne’e.

“Ida ne’e ezemplu di’ak ida ba parseria entre Timor-Leste no Japaun. Ha’u sempre enfatiza importansia husi relasaun entre ema ba ema. Ha’u dezeja imi hotu bele aproveita didi’ak interkambiu kultural no hametin amizade entre país rua”, Embaixador ne’e afirma liuhosi  nia-diskursu iha Timor Plaza-Dili.

Diplomata ne’e hateten Organizasaun Naun Governamental Japaun sira servisu hamutuk ona ho komunidade lokal sira hodi fornese no promove produtu lokal.

Iha fatin hanesan, Ministru Juventude Desportu, Arte no Kultura, Nélio Isaac Sarmento, hateten, eventu refere atu hamentin lasu amizade Timor-Leste no Japaun.

“Eventu ne’e  hatudu  mai ita katak ita nia relasaun ho povu Japaun no Timor-Leste metin tebe-tebes. Japaun hanesan país ida ne’ebé desde inísiu kedas sempre fo apoio maka’as ba Timor-Leste. Ohin loron ita mai iha ne’e, mesmu ita la ba Japaun, maibe ita sente katak ambiente Japaun iha Timor Plaza iha kalan ida ne’e”, dehan Governante ne’e.

Nia haktuir Programa sira hanesan bele  hakbesik liutan timoron  ho familia Japaun sira hodi fortifika liutan koperasaun iha futuru.

Entretantu, Chief Executive Officer (CEO) East Timor Trading Group, Samitha Aluwihare hateten, iha kompromisu hakarak promove interkultural rai rua.

“Hamutuk ita promove Timor-Leste iha mundu no ita apoio dezenvolvimentu setor turizmu, ho ida ne’e ita atrai ema iha mundu, apoio diversifikasaun ekonomia no kria empregu ba timoroan”, Xefe Samitha Alueihare.

Jornalista: Jesuína Xavier

Editor   : Florencio Miranda Ximenes

iklan
iklan

Leave a Reply

iklan
error: Content is protected !!