DILI, 16 Setembru 2025 (TATOLI)–Embaixadór foun Uniaun Europeia iha Timor-Leste, Thorsten Bargfrede, tersa ne’e, entrega karta kredensiál ba Prezidente Repúblika, José Ramos-Horta, iha Palásiu Prezidensiál Nicolau Lobato, bairu Pite, Dili.
Relasaun diplomátika entre Timor-Leste no Uniaun Europeia ne’ebé estabelese iha loron 20 fulan-Maiu tinan 2002, iha abut kle’an iha parseria ida-ne’ebé kle’ur ona bazeia ba valór sira-ne’ebé fahe ba malu kona-ba demokrasia, direitu umanu no Estadu direitu.
“Uniaun Europeia nu’udar parseiru dezenvolvimentu dahuluk ne’ebé fó apoiu ba Timor-Leste, defende prinsípiu nasaun rasik mak na’in, nasaun rasik mak lidera no uza sistema nasaun nian rasik,” Ramos-Horta hateten iha nia intervensaun bainhira simu karta kredensiál, iha Palásiu Prezidensiál Nicolau Lobato, Bairru Pite.
Daudaun ne’e, kooperasaun atuál entre Timor-Leste ho UE foka ba diversifikasaun no kreximentu ekonómiku, boa-governasaun, dezenvolvimentu verde no sustentável, inkluzaun sosiál no integrasaun rejionál, notavelmente liuhusi apoiu ba Timor-Leste nia adezaun ba ASEAN no Organizasaun Mundiál Komérsiu.
Embaixadór foun, Thorsten Bargfrede, nu’udar diplomata ida-ne’ebé iha esperiénsia ho karreira distintu iha Servisu Asaun Esterna Europeu nian.
Nia lori esperiénsia barak husi kargu xave sira iha Sri Lanka, Maldivas, Kénya, Pakistaun no Bruxelas, ho foku ba asuntu polítiku sira, planeamentu estratéjiku no kooperasaun dezenvolvimentu.
Tanba ne’e, Prezidente Ramos-Horta espresa ninia konfiansa katak Embaixadór nia esperiénsia diplomátika ne’ebé extensivu sei kontribui signifikativamente ba aprofundamentu ligasaun bilaterál sira.
“Uniaun Europeia sai hanesan parseiru ida-ne’ebé metin dezde momentu sira uluk liu iha ita-nia nasaun nia renasimentu. Ita-nia parseria ne’ebé bazeia ba respeitu mútuo no valór sira-ne’ebé fahe ba malu, kontinua fó kbiit ba ita-nia instituisaun no ita-nia povu,” nia dehan.
Nia hatutan, apoiu husi UE nian fundamentál tebes ba Timor-Leste nia luta ba reziliénsia ekonómika, integrasaun rejionál no futuru sustentável ba timoroan sira hotu.
“Ita hein atu servisu hamutuk ho Embaixadór Bargfrede hodi hametin liután aliansa importante ida-ne’e,” nia dehan.
Prezidente Ramos-Horta rekoñese projetu oioin ne’ebé hala’o hela ne’ebé hetan apoiu husi Ekipa Europa no dezeja ba Embaixadór Bargfrede mandatu ida-ne’ebé susesu no produtivu iha Timor-Leste.
Jornalista : Hortencio Sanchez
Editór : Cancio Ximenes
