DILI, 17 Setembru 2025 (TATOLI) – Treinadór hamutuk na’in-21 partisipa formasaun hodi hetan sertifikadu lisensa kategória C husi Federasaun Futeból Timor-Leste (FFTL).
Prezidente FFTL, Nilton Gusmão, informa ba formandu hirak-ne’e atu aproveita oportunidade hodi aprende di’ak liután nune’e futuru bele prepara-an di’ak liután hodi sai treinadór ne’ebé kualifikadu.
“Treinadór timoroan mós iha kapasidade atu lidera ekipa hodi bele kompete iha kompetisaun nasionál no internasionál sira iha futuru,” Nilton Gusmão hateten liuhosi nota imprensa ne’ebé Tatoli asesa, kuarta ne’e.
FFTL realiza formasaun ba treinadór hirak-ne’e liuhusi diresaun tékniku durante loron 14 ne’ebe abertura iha loron-4 to’o 17 Setembru 2025, ne’ebé matéria formasaun ne’e kompostu teória no prátika iha kampu.
Sekretáriu Jerál FFTL, José Adilson Ribeiro husu ba formandu sira atu envolve-an ba iha klubu sira nu’udar asisténsia treinadór nune’e implementa matéria ne’ebé hetan ona husi treinamentu ba klubu sira.
“Espera matéria ne’ebé durante hetan husi treinamentu bele hatutan fali ba jogadór sira hodi garante dezenvolvimentu futeból iha Timor-Leste ba futuru,” José Ribeiro komenta.
Entretantu, durante formasaun matéria oferese husi Instrutór Emral Bin Bustaman no Gopal Krishnan no organiza husi Diretór Tékniku FFTL, Gaspar Quintão, Ofisiál Tékniku, Nidio Octavio das Dores Neto.
Jornalista : Natalino Belo
Editór : Evaristo Soares Martins
