DILI, 16 Setembru 2025 (TATOLI)—Diretór Interinu Institutu Nasionál Farmasia, Produtu no Medikamentu (INFPM), Miguel Soares, hateten silindru osijéniu daudaun ne’e sufisiente iha Institutu Nasionál Farmasia Produtu medikamentu (INFPM) hodi atende ba fasilidade saúde sira iha Timor-Leste.
Kona-ba estoke silindru osijéniu, agora daudaun ita sufisiente maibé nesesidade konsumu iha fasilidade saúde sira mak makaas, entaun ita mós iha ona rezerva ezbosu kontratu balun atu asegura ninia kontinuasaun mak sei fó ba empreza fornesedór ne’ebé mak halo osijéniu ne’e mai iha INFPM atu halo renovasaun kontratu, nune’e ita bele atende ba fasilidade saúde sira iha Timor-Leste,” Miguel Soares hateten ba jornalista sira iha nia kna’ar fatin, Kampung Alor, ohin.
Nia esplika, empreza ne’e naran JL ninia lokalizasaun iha Bebonuk ne’ebé ida-ne’e laiha problema tanba empreza ne’e internasionál.
“Kona-ba kuantidade konsumu osijéniu iha fasilidade saúde sira-ne’ebé mak utiliza barak-liu mak HNGV, depois mak ospitál referál sira iha munisípiu. Ezemplu, HNGV iha fulan ida-nia konsumu 30 mil silindru tuir mak ospitál referal RAEOA, ospital referral Maubisse, Ospitál Maliana no Ospitál Horex Baucau,” nia relata.
Antes ne’e, Daikyo Industrial Gas and Equipment (DIG) husi Filipina, kada fulan fornese silindru osijéniu hamutuk 4.000 hodi apoia Hospitál Nasional Guido Valadares (HNGV).
Jestór DIG, Rosell G. NaJe hateten empreza eziste ona durante tinan 23 iha Timor-Leste servisu hamutuk ho HNGV atu ajuda pasiente sira-ne’ebé moras.
Nia haktuir, fornesementu botir gás ne’e la’ós ba de’it HNGV maibé fornese mós ba ofisina sira iha Dili nomós empreza soldadura sira iha Dili laran.
“Ami-nia funsionáriu hamutuk 15 kompostu husi timoroan na’in-12 no Filipina na’in-tolu (3) halo ona operasaun kuaze tinan 23. Durante ne’e ami enfrenta difikuldade sira hanesan aluga rai tanba rai karun, folin $4.000/bulan. Tanba ne’e mak ami rekomenda ba Governu Timor-Leste atu fornese rai balun, nune’e ami bele kontinua ami-nia investimentu iha Timor-Leste,” NaJe hateten.
NaJe fó hanoin katak iha futuru kuandu iha ona zona indústria, sei muda bá fatin saudável ho objetivu atu asegura saúde públika hodi kontinua atividade indústria iha Timor-Leste, nune’e kria tan oportunidade servisu iha diversifikasaun ekonomia.
Silindru gás serve atu konserva gás médiku iha alta tensaun. Silindru ida-ne’e konstruidu husi matéria ne’ebé rezile ba presaun no livre uza hodi konserva gás médiku.
Jornalista : Felicidade Ximenes
Editór : Cancio Ximenes
