KOVALIMA, 18 Setembru 2025 (TATOLI)- Servisu Munisípiu Agrikultura (SMA) Kovalima liuhusi Departamentu Pekuária no Veterinária, vasina ona asu hamutuk 469 ho aimoruk antí rabies hodi prevene moras rabies iha Timor-Leste.
“Totál asu ne’ebé rejista hamutuk 728 husi númeru ne’e asu ne’ebé mak tékniku sira vasina ona 469 no asu ne’ebé mak seidauk simu vasina antí rabies ne’e hamutuk 218”, Xefe Departamentu Pekuária no Veterinária, Urbanu Maria Tilman Suri, relata dadus ne’e ba TATOLI, iha Tabakolot, ohin.
Razaun tékniku sira asu balun seidauk konsege vasina tanba haki’ak na’in ba asu informa ba tékniku sira dehan katak difísil atu kesi no ema laiha atu kesi, nune’e sai dezáfiu ba tékniku sira atu vasina anti raiva ba asu sira.
Maske durante tékniku hala’o servisu hasoru dezafiu, maibé tékniku sira kontinua esforsu hodi la’o tama sai uma atu vasina komunidade sira-nia asu ne’ebé mak komunidade sira haki’ak,nune’e hodi prevene moras rabies hada’et ba animál seluk no ba ema.
“Dadaun ne’e ami-nia tékniku sira vasina komunidade nia asu ho antí raiva iha postu administrativu Fatululik hafoin sei kontinua ba iha postu administrativu seluk ne’ebé mak seidauk konsege kobre”, nia afirma.
Ho nune’e, Xefe Departamentu husu ba inan-aman ne’ebé mak hakiak asu atu koopera ho tékniku sira, bazeia ba koordenasaun ba xefe suku no xefe aldeia orienta komunidade sira kesi asu nune’e fasilita tékniku sira vasina asu antí rabies ba asu nune’e minimiza virus raiva hadaet ba animal seluk no mós ba ema.
Jornalista : Celestina Teles
Editór :Florencio Miranda Ximenes
