Influensiadór Charlie Kirk hetan tiru mate iha Amérika
DILI, 11 Setembru (TATOLI) – Ativista polítiku no komentadór direita norte-amerikanu Charlie Kirk, aliadu influente ida hosi Prezidente Donald Trump, hetan tiru mate iha kakorok iha loron-kuarta iha eventu ida iha universidade Utah nian.
Charles James Kirk nu’udar ativista polítiku, autór no personalidade mídia nian ida hosi ala-loos amerikanu. Nia ko-funda organizasaun konservadór Turning Point USA iha 2012 no sai hanesan ninia diretór ezekutivu. Nia maka xefe ezekutivu hosi Turning Point Action no membru ida hosi Konsellu ba Polítika Nasionál.
“Boot no mós lendáriu, Charlie Kirk, mate ona. Laiha ema ida maka komprende ka iha fuan juventude nian iha Estadu Unida Amérika di’akliu Charlie. Nia hetan domin no admirasaun hosi ema hotu, liuliu ha’u, no agora, nia la hamutuk ona ho ita”, Trump hakerek iha mídia sosiál, ne’ebé fó-sai husi Reuters, kuarta ne’e.
Klip vídeu sira hosi telemovel hosi insidente ne’ebé sirkula iha mídia sosiál hatudu Kirk, ho tinan 31, dirije ba ema lubun boot ida iha li’ur iha kampus eskola nian iha Orem, Utah, besik tuku 12:20 lokraik. MT (1620 GMT), bainhira tiru ida lian. Kirk muda nia liman ba nia kakorok bainhira nia monu hosi nia kadeira, hodi halo partisipante sira halai.
Suspeitu provavelmente tiru hosi uma-kakuluk, autoridade sira hatete, hodi hatutan katak iha ema na’in 3,000-resin maka halibur iha eventu ne’e.
Omisídiu ne’e maka ida ikus liu iha série atake sira hasoru figura polítika sira EUA nian, inklui tentativa asasinatu rua ba Trump iha tinan kotuk, ne’ebé subliña ona aumentu maka’as ida iha violénsia polítika.
“Ida-ne’e maka loron nakukun ida ba ami-nia estadu, hanesan loron trájiku ida ba ami-nia nasaun. Ha’u hakarak sai klaru tebes katak ida-ne’e hanesan asasinatu polítiku ida,” Governadór Spencer Cox hatete iha konferénsia imprensa.
Kirk nia iha loron-kuarta maka dahuluk iha eventu 15 ne’ebé planeadu “American Comeback Tour” iha universidade sira iha nasaun tomak. Dala barak nia uza eventu sira hanesan ne’e, ne’ebé normalmente atrai estudante lubun boot, hodi konvida partisipante sira atu debate ho nia diretamente.
Antes nia hetan tiru, Kirk hetan inteRrogasaun hosi membru audiénsia ida kona-ba violénsia ho kilat, tuir vídeu oinoin hosi eventu ne’ebé publika iha internete.
“Ita-boot hatene tiru-na’in hira maka iha Amérika iha tinan 10 ikus ne’e?” Husu ba Kirk.
Nia hatán, “Konta ka la sura violénsia gang nian?” Nia hetan tiru momentu balun liutiha.
Polísia seidauk fó sai públikamente detalle ruma kona-ba posivel suspeitu ida.
Kirk Influensiadór
Kirk ho grupu ne’ebé nia ko-funda, Turning Point USA, organizasaun juventude konservadór boot liu iha nasaun, hala’o papél xave ida hodi dudu apoiu hosi votante joven sira ba Trump iha fulan-Novembru.
Hafoin manán nia mandatu prezidensiál daruak, Trump fó kréditu ba Kirk tanba mobiliza votante sira-ne’ebé joven liu no votante sira ho kór hodi apoia nia kampaña.
“Ita-boot iha ezérsitu sira iha baze Turning Point nian,” Trump hatete iha manifestasaun ida iha Phoenix iha fulan-Dezembru. “La’ós ha’u-nia vitória, ne’e ó nia vitória.”
Kirk iha seguidór millaun 5.3 iha X no sai hanesan uma-na’in ba podcast no programa rádiu ida ne’ebé populár, “The Charlie Kirk Show.” Foin lalais ne’e nia mós ko-anfitriaun ba “Fox & Friends” iha Fox News.
Nia halo parte iha ekosistema ida hosi influensiadór konservadór sira pró-Trump nian – inklui Jack Posobiec, Laura Loomer, Candace Owens no sira seluk – ne’ebé ajuda atu habelar ajenda Prezidente nian.
Kirk ataka beibeik mídia prinsipál no envolve iha kestaun sira funu kulturál nian kona-ba rasa, jéneru no imigrasaun, dala barak ho estilu provokativu.
Iha White House, membru sira hosi funsionáriu sira, barak hosi sira maka joven no admiradór sira Charlie Kirk nian, sai metan bainhira notísia kona-ba tiruteiu ne’e espalla.
Trump hatete iha mídia sosiál katak nia haruka bandeira sira hotu hosi Estadus Unidus atu hasa’e ho meia-estafe to’o domingu hodi fó onra ba Kirk.
Violénsia Polítika iha EUA amuenta
Enkuantu motivu ba tiruteiu ne’e deskoñesidu, Estadu Unida hasoru hela nia períodu violénsia polítika ne’ebé sustentável liu dezde dékada 1970. Reuters dokumenta ona kazu liu 300 hosi hahalok violentu sira ho motivasaun polítika dezde apoiante sira Trump nian ataka Kapitóliu Estadu Unida nian iha loron 6 Janeiru 2021.
Iha Jullu 2024, republikanu Trump hetan sona hosi kilat-musan ida durante eventu kampaña nian iha Butler, Pennsylvania. Tentativa asasinatu daruak fulan rua liutiha hetan frustrasaun hosi ajente federál sira.
Iha fulan-Abríl, inséndiu ida tama iha Governadór Demokrátiku Pennsylvania nian Josh Shapiro nia rezidénsia no sunu enkuantu família iha laran.
Iha inísiu tinan ida-ne’e, ema ida ho kilat ne’ebé finje hanesan polísia iha Minnesota oho deputada estadu demokrátiku Melissa Hortman ho nia la’en no tiru senadór demokrátiku John Hoffman ho nia feen. No iha Boulder, Koloradu, mane ida uza lansa-ahi improvizadu no koktel Molotov hodi ataka eventu solidariedade ida ba refén izraelita sira, hodi oho feto ida no hakanek pelumenus na’in-neen tán.
Iha 2022, mane ida tama iha Prezidente Kámara Demokrátiku iha tempu ne’ebá Nancy Pelosi nia uma no baku nia la’en ho martelu, hodi husik nia ho fratura iha kakutak no kanek sira seluk.
Iha 2020, grupu ida hosi membru milísia direita nian sira halo planu atu na’ok Governadór Michigan nian Gretchen Whitmer, Demokrata ida, maibé la hetan susesu.
Polítiku republikanu no demokrátiku sira espresa sira-nia laran-taridu kona-ba tiruteiu ne’e.
“Fó deskansa rohan-laek ba nia, Na’i,” Vise-Prezidente JD Vance, ne’ebé besik ho Kirk, hakerek iha X.
“Atake hasoru Charlie Kirk maka buat-ne’ebé maka halo ema hakribi, aat no reprensivel,” Governadór Demokrátiku California nian, Gavin Newsom, hatete iha X, antes Kirk nia mate hetan konfirmasaun.
TATOLI
