DILI, 08 Setembru 2025 (TATOLI) – Deputadu KHUNTO, António Verdial de Sousa, apela ba joven sira atu kontribui ba pás no estabilidade iha rai-laran.
Apelu ida-ne’e halo tanba membru Parlamentu Nasionál ne’e, lamenta ho atitude joven balun ne’ebé halo konfrontu ka tuda malu hodi rezulta lampu ne’ebé monta iha muru Embaixada Kamboja iha Markoni, Dili, rahun.
Nia dehan, situasaun ne’e bele estraga imajen país nian ne’ebé iha fulan-Outubru nia laran sai formalmente membru plenu ba Organizasaun Nasaun Sudeste Aziátiku (ASEAN, sigla inglés).
“Ba sidadaun hotu, liuliu joven kria estabilidade ba prosesu ne’ebé Governu agora hala’o maka’as atu tama ba ASEAN”, nia apela.
Iha fatin hanesan deputadu CNRT, Patrocínio dos Reis Fernandes, husu sidadaun hotu atu kontribui ba estabilidade, hodi hatudu nafatin imajen país nian.
Tanba Estadu tomak dadaun hala’o serbisu liuhusi misaun diplomátika, Prezidente Repúblika no Governu rasik halo esforsu hodi mantein imajen di’ak iha komunidade internasionál hodi atrai investidór mai rai-laran.
“Situasaun iha [Markoni] ne’e hatudu imajen ladi’ak, liuliu ba embaixada, sira sente la seguru”, nia lamenta.
Deputadu ne’e, alerta ba Polísia Nasionál Timor-Leste (PNTL) atu reforsa vijilánsia hodi asegura área sira ne’ebé risku ba konflitu.
Deputadu CNRT, Natalino dos Santos, husu mós autoridade seguransa atu halo investigasaun kle’an ba suspeitu sira ne’ebé envolve iha kazu ne’e.
Komandante PNTL Munisípiu Dili, Superitendente Xefe Polísia Orlando Gomes, hateten polísia halo ona identifikasaun ba suspeitu na’in-haat ne’ebé envolve iha kazu tuda malu hodi rezulta lampu ne’ebé monta iha muru Embaxada Kamboja iha Markoni rahun.
Kazu konfrontu entre joven sira husi grupu tolu ne’e akontese iha Domingu (6/9) iha área Markoni, iha aldeia 04 , suku Fatuhada.
Notísiarelevante: https://tatoli.tl/2025/09/06/pntl-identifika-suspeitu-harahun-lampu-embaixada-kambodia-iha-markoni/
Jornalista: Nelson de Sousa
Editora: Maria Auxiliadora
