DILI, 22 Setembru 2025 (TATOLI)-Parlamentu Nasionál, liuhusi reuniaun plenária, aprova votu pezár ba falesimentu deputadu husi bankada Klibur Haburas Unidade Nasionál (KHUNTO), António Verdiál da Silva Ferreira.
Deputadu sira aprova votu pezár a favór 52, kontra no abstensaun 0. “Nune’e, votu pezár liu ho unanimidade”, Prezidente Parlamentu Nasionál, Maria Fernanda Lay, fó sai iha sala plenária, ohin.
Sekretária Meza PN, Virgínia Ana Belo, lee sai testu votu pezár katak, deputadu António Verdial da Silva Ferreira, hakotu iis iha loron 20 Setembru 2025, iha Ospitál Nasionál Guido Valadares (HNGV, sigla portugés).
Matebian moris iha Ainaru, iha loron 30 fulan-Maiu tinan 1968, husi aman Manuel Ferreira, no inan Celestina da Silva Barros. Matebian kaben ho Sofia do Rosório Caldas, no iha oan na’in-haat.
António Verdial da Silva Ferreira lisensiadu iha Administrasaun Públika iha Universidade Orientál Timor-Lorosa’e (UNITAL) iha tinan 2024.
Iha 1988-1989, reprezenta nu’udar atleta futeból no maratona husi munisípiu Ainaru no nomeadu hanesan membru prinsipál organizasaun Kmanek Oan Rai Klaran (KORKA).
Partisipa mós luta rezisténsia klandestina no prosesu libertasaun nasionál Timor-Leste iha tinan 1987-1988.
Iha tinan 1999, hamutuk ho konselleiru masimu partidu KHUNTO, José dos Santos Naimori Bucar, halo mobilizasaun masa iha propaganda polítika kona-ba prosesu referendu, hanesan mós sobrevivente masakre Manutasi, Ainaru.
Matebian nu’udar mós fundadór partidu KHUNTO iha 2010 no ezerse funsaun hanesan konselleiru nasionál partidu nian.
Matebian eleitu nu’udar membru Parlamentu Nasionál iha eleisaun parlamentár 2023, asume vise-prezidente bankada parlamentár KHUNTO iha lejislatura daneen.
António Verdiál da Silva Ferreira hanesan membru deputadu iha komisaun F trata Asuntu Saúde, Seguransa Sosiál no Igualidade Jéneru.
“Ho konsternasaun Parlamentu Nasionál la espera ho sokante falesimentu ba nia deputadu ida, eselente, kualidade umana, ho kapasidade oioin iha serbisu no abertura konsensu polítiku iha própriu ambiente parlamentár. Nune’e Parlamentu Nasionál reúne iha sesaun plenária espresa profundu pezár no enderesa sentida kondolénsia ba oan ki’ak, família no partidu KHUNTO”, hato’o.
Sesaun solene hodi fó omenajen
Iha sesaun solene omenajen ba deputadu António Verdiál da Silva, deputadu sira aprova uluk votu pezár, kontinua ho inu nasionál no minutu ida silénsiu ba erói sira ne’ebé luta ba indepedénsia nasaun ne’e no espesiál ba memória ba maktoban.
Iha intervensaun husi bankada parlamentár, xefe bankada KHUNTO, António Verdial de Sousa, konsidera bankada partidu no organizaun KORKA lutu metan ho matan-been lakon lideransa di’ak ida. “Ita-nia obra husi inísiu sura la hotu, hirus la hatene, la haluha ita ba furak sira ne’ebé husik hela”, nia dehan.
Prezidente Komisaun F, Maria Gorumali Barreto, haktuir matebian durante hamutuk tinan rua no fulan tolu iha Komisaun, nia ema ida sempre partisipa ativa hodi kontribui ba serbisu iha Komisaun iha nasionál no munisípiu hodi hala’o atividade fiskalizasaun. “Laran osan-mean, nunka kolen”.
Reprezentante husi bankada parlamentár CNRT, PD, FRETILIN, PLP, espresa mós sentidu tristeza no hato’o kondolénsia ba família enlutada no husu orasaun atu akompaña matebian deskansa hakmatek iha reinu lalehan.
Presta omenajen ikus ba matebian iha sala plenária ne’ebé nakonu ho tristeza no matan-been, ne’ebé marka mós prezensa husi funsionáriu sira iha Parlamentu.
Hafoin ne’e, família enlutada lori kedas matebian ba rai moris fatin iha Ainaru no iha loron 23 fulan-Setembru sei hala’o serimónia fúnebre.
Notísia relevante: https://tatoli.tl/2025/09/21/khunto-lakon-deputadu-antonio-verdial-pereira/
Jornalista: Nelson de Sousa
Editora: Maria Auxiliadora
