SEKOMS enkoraja estudante KomSos UNTL sai mensajeiru hato’o lia-loos ba públiku
DILI, 11 Setembru 2025 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, enkoraja estudante Komunikasaun Sosiál (KomSos) ne’ebé aprende komunikasaun sosiál, bainhira sai jornalista karik tenke sai mensajeiru no misionáriu ida atu lori mensajen ne’ebé loos, kredivel ba públiku atu hatene.
“Bainhira sai ona jornalista tenke lori mensajen ne’ebé loos ba públiku. Ita labele lori mensajen ne’ebé halo públiku sai konfuzaun, tanba misaun ne’ebé ita hala’o mak lori informasaun ne’ebé loos atu públiku bele hatene no komprende kona-ba dezenvolvimentu nasionál no prosesu konstrusaun Estadu ne’ebé daudaun ne’e la’o hela,” Sekretariu Estadu ne’e hateten ba jornalista sira hafoin aprezenta palestra ba estudante Komunikasaun Sosiál UNTL sira iha semináriu durante loron tolu ho tópiku “Importánsia Komunikasaun Sosiál iha Demokrasia Nasionál”, iha Kampus UNTL, Kaikoli, kinta ne’e.
Aleinde ne’e, governante ne’e apresia estudante Universidade Nacional Timor-Lorosa’e (UNTL) husi Departamentu Komunikasaun Sosiál ne’ebé la’ós aprende de’it teoria kona-ba siénesia jornalizmu maibé konsege pratika ho reportajen eskrita iha tipu oioin.
“Ha’u apresia tebes ho alin estudante hirak ne’e, sira la’ós de’it aprende iha teoria maibé sira mós konsege halo prátika iha reportajen eskrita, foto jornalizmu, iha mós gráfiku jornalizmu no mós Talk Show,” nia dehan.
Nia informa, Governu kontinua fó apoiu másimu ba UNTL liuliu Departamentu Komunikasaun Sosiál atu prodús joven ne’ebé ho kualidade iha komunikasaun sosiál.
“Ita hatene katak papel mídia nian iha pilár demokrasia no papel importante haat (4) ne’ebé mídia plataforma, konvensionál, dijitál sira iha hanesan informadór, edukadór fó divertimentu no halo kontrolu sosiál,” nia dehan.
Jornalista : Hortencio Sanchez
Editór : Cancio Ximenes
