KOVALIMA, 23 Setembru 2025 (TATOLI)- Autoridade Kovalima liuhusi Servisu Munisipál Planeamentu Integradu no Dezenvolvimentu fó prioridade ba setór Saúde no Agrikultura.
“Iha 2025 ne’e, ita iha projetu Planeamentu Integradu no Dezenvolvimentu tolu hanesan konstrusaun Sentru Saúde no rezidénsia ba médiku iha Fatumea, rezidénsia pesoál ba médiku iha Postu administrativu Fohorem ne’ebé mak la’o hela no konstruisaun irrigasaun iha Zumalai finaliza ona”, Diretór Servisu Munisipál Planeamentu Integradu no Dezenvolvimentu, Carlito Barros dos Reis, relata ba TATOLI iha nia servisu fatin AMC.
Daudaun ne’e, progresu projetu PDIM hanesan konstrusaun Sentru Saúde no Rezidénsia Médiku iha Fatumea atinje pursentu 14 no projetu konstruisaun rezidénsia médiku iha Fohorem atinje ona porsentu 25%. Enkuantu Projetu konstrusaun irrigasaun iha Zumalai finaliza ona.
Orsamentu Jerál Estadu (OJE) 2025 atu halo implementasaun ba projetu Planeamentu Dezenvolvimentu Integradu Munisipál (PDIM) ba setór Saúde no agrikultura ne’e hamutuk rihun $711.
Aleinde implementa projetu PDIM autoridade mós iha orsamentu poupansa husi projetu tolu hamutuk $85 170.82 ne’ebé autoridade uza hodi halo konstrusaun Jardím ba Saudozu Alvaro de Jesus ho kódigu “Sesurai”
Prosesu utilizasaun atu halo konstruisaun jardím referidu, daudaun ne’e empreza sira hahú foti ona dokumentu, nune’e empreza sira bele submete dokumentu ba konkursu públiku.
Jornalsta: Celestina Teles
Editór:Florencio Miranda Ximenes.
