DILI, 02 Setembru 2025 (TATOLI)–Primeiru-Ministru (PM), Kay Rala Xanana Gusmão husu Universidade sira iha Timor-Leste atu loke diskusaun aberta hodi kapasita joventude sira-nia vizaun atu hateke ba futuru.
Notísia Relevante: “Ita bolu malu butuk iha minstériu ne’e, sé mak dezenvolve ita-nia rain”
“Saida mak ita atu kontribui ba nasaun, Universidade sira tenke loke diskusaun boot sira, provoka took atu nune’e joven sira atu hanoin kona-ba futuru rai ida-ne’e nian,” Xefe Governu hateten bainhira sai oradór prinsipál iha semináriu nasionál ne’ebé realiza husi Prezidente Repúblika José Ramos-Horta ho tema “Papél jerasaun foun iha kontextu dezenvolvimentu nasionál hodi hatutan obra jerasaun tuan”, iha Palásiu Prezidensiál Nicolau Lobato, Bairru Pite, tersa ne’e.
Universidade labele hanorin de’it estudante sira atu sai futuru lider ho mestradu (S2) no doutoramentu (S3) maibé lahatene haree ba joven sira-nia vizaun ba nasaun ne’e susar.
“Ita labele hanorin de’it futuru líder no ó tenke sai mestradu, dotoramentu, ne’e la-too. Tenke provoka diskusaun atu hanorin joven sira oinsá prepara-aan ba futuru rai ida-ne’e nian,” nia fó hanoin.
Tuir nia, provoka diskusaun la’ós halo de’it iha Dili maibé bele sai ba iha munisípiu sira halo akampamentu, halo reflesaun, troka esperiénsia kona-ba saida mak halo ona, dalaruma balun difisiénsia iha mentalidade kompara ho ema difisiénsia fíziku maibé sira-nia mentalidade la difisiénsia no kapaas loos.
Bainhira joven no Universidade sira la konvoka diskusaun hodi troka hanoin ba malu kona-ba futuru rai ida-ne’e nian, susar tebes atu hakat ba oin no sei hamosu difisiénsia iha mentalidade.
“Ne’edun,i vizaun ba futuru liuliu joven sira tenke ko’alia ba malu, diskute, ko’alia kona-ba ita-nia rain, saida mak ita bele halo,” nia dehan.
Jornalista : Hortencio Sanchez
Editór : Cancio Ximenes
