BTL halo ona melloramentu sistema bee-moos ba uma kain 83.204
DILI, 09 Setembru 2025 (TATOLI)—Vise-Prezidente Tékniku Bee Timor-Leste, Empreza Públika (BTL, E.P), José Filipe Ximenes Smith, hateten iha tinan 2025 konsege halo ona melloramentu sistema bee-moos ba uma kain 83,204 ho totál populasaun hamutuk 476.806 iha munisípiu sira.
Notísia Relevante: Instalasaun bee-moos sai difikuldade ba konstrusaun Dili Sidade Istórika
“Fornesementu bee-moos iha munisípiu sira-ne’e kuaze ita fornese lubuk ida ona. Maske seidauk 100% maibé ita sei esforsu hodi mellora liután ba parte seluk ne’ebé sei falta bee-moos. Munisípiu sira-ne’ebé BTL liberta ona fornesementu bee-moos kuaze Postu Administrativu 30-resin, balun agora besik ona ba faze inaugurasaun,” Vise-Prezidente ne’e hateten ba Agência Tatoli iha edifísiu BTL, E.P, Kaikoli, ohin.
Nia dehan, BTL, E.P nia misaun atu aumenta asesu universál no ekuitativu ba servisu bee-moos no saneamentu ne’ebé seguru ba ema hotu iha territóriu.
Nia informa, Munisípiu ne’ebé asesu ona bee-moos iha tinan 2025 mak hanesan Ainaru totál uma kain 1.141 ho nia populasaun 9.239, Aileu totál uma kain 1.754 ho nia populasaun 6.679, Baukau totál uma-kain 4.929 ho nia populasaun 27.123, Bobonaru totál uma kain 3.923 ho nia populasaun 22.085, Kovalima totál uma kain 2,726 ho nia populasaun 13.822, Dili totál uma-kain 54.688 ho nia populasaun 321.347.
Enkuantu, Munisípiu Ermera totál uma kain 3.409 ho nia populasaun 20.828, Lautein totál uma kain 3,052 ho nia populasaun 16.326, Likisa totál uma kain 2.250 ho nia populasaun 11.937, Manatutu totál uma-kain 1.263 ho nia populasaun 6.627, Manufahi totál uma kain 2.556 ho nia populasaun 12.994 no Vikeke totál uma kain 1.513 ho nia populasaun hamutuk 7.799.
Jornalista : Alexandra da Costa
Editór : Cancio Ximenes
