DILI, 24 Setembru 2025 (TATOLI)-Primeiru-Ministru (PM) Malázia, Dato Seri Anwar Ibrahim, reitera nia apoiu ba Timor-Leste nia adezaun sai membru plenu ba Asosiasaun Nasaun Sudeste Aziátiku (ASEAN, sigla inglés).
Nune’e mós elojia esforsu Timor-Leste nian ba preparasaun sira hotu ne’ebé formalmente sei sai membru plenu iha loron 26 fulan-Outubru 2025 iha Kuala Lumpur, Malázia.
Nia dehan Timor-Leste hola parte iha rejiaun Sudeste Aziátiku no parte ASEAN laiha razaun atu demora prosesu, klaru katak difikuldade mak ekonomia foun ida-ne’ebé mosu.
Tuir Xefe Governu Malázia, iha asuntu báziku kona-ba infraestrutura no kapasitasaun ne’e mak devér atu apoiu, nune’e bolu ona Malázia, Governu no setór privadu liga ba empreza sira Petronas atu mai serbisu hamutuk no investe iha ne’e.
“Bainhira ha’u asume prezidénsia iha tinan kotuk, liuhusi buat hotu ne’ebé presiza, ha’u tenke fó fiar ba Governu no líder sira hotu iha rai ASEAN no uza influensia hotu ne’ebé ha’u iha atu hetan. Hatudu ba Timor-Leste atu sai membru plenu ASEAN”, nia hato’o iha sesaun solene iha Parlamentu Nasionál, ohin.
Nia fiar ho integrasaun ne’e, iha tinan 2026, nasaun ASEAN iha atividade barak liután iha Timor-Leste no ida-ne’e lori vantajen kolaborasaun ekonómika.
Nune’e, Malázia kontinua apoia no hametin kooperasaun ho Timor-Leste boot liután ba prosperidade país rua nomós ASEAN.
Biban ne’e, Primeiru-Ministru Malázia elojia serbisu Parlamentu Nasionál ne’ebé hala’o papél importante iha integrasaun ne’e hodi trata lejislasaun sira.
Xefe Ezekutivu ne’e partilla mós valór demokrasia, liuliu órgaun lejislativu país rua hodi asegura katak reprezenta duni povu nia aspirasaun.
Hodi louva demokrásia país joven, iha ne’ebé bankada parlamentár sira tantu opozisaun ho dinámika iha konsensu ba asuntu komún.
Notísia relevante: PPN destaka kooperasaun ho Malázia iha komérsiu, edukasaun no teknolojia
Jornalista: Nelson de Sousa
Editora: Maria Auxiliadora
