Delegasaun BERNAMA vizita TATOLI hodi fortalese parseria iha área mídia nian 

DILI, 19 Setembru 2025 (TATOLI) – Delegasaun husi Ajénsia Notísia Nasionál Malázia (BERNAMA) hala’o vizita ba Ajénsia Notísioza Timor-Leste – TATOLI, I.P, hodi reafirma kompromisu atu hametin kooperasaun iha área mídia nian.

Delegasaun husi BERNAMA ne’e ho membru na’in-10, ne’ebé lidera husi Xefe-Adjuntu Editór Servisu Notísia nian, Mohd Shukri Ishak. Sira-nia prezensa simu diretamente husi Prezidente Konsellu Diretivu TATOLI, I.P, Noémio Falcão, ne’ebé simu ho tara tais nu’udar símbolu amizade nian.

Hafoin serimónia boas-vindas, parte rua ne’e hala’o enkontru kuaze minutu 30. Depoizde hasoru malu, delegasaun hala’o vizita iha sala redasaun, inklui sala multimédia, no mini estúdiu live streaming.

Xefe-Adjuntu Editór Servisu Notísia nian, Mohd Shukri Ishak, subliña katak iha vizita ne’e, BERNAMA haree oportunidade barak ba kolaborasaun ho TATOLI, ne’ebé bele formaliza liuhusi memorandu entendimentu (MoU) ida.

“Ami haree oportunidade ba kolaborasaun entre BERNAMA no TATOLI hodi estabelese MoU ba troka notísia no troka programa nian. Ami hein katak ida-ne’e bele implementa, tanba sei iha tan kontinuasaun diskusaun hodi estabelese kolaborasaun ida ne’ebé forte liu, atu parte rua fasilita malu notísia”, Mohd Shukri Ishak hateten iha Faról.

Aleinde ne’e, kooperasaun potensiál ne’ebé diskute mak troka kolokasaun jornalista sira, iha ne’ebé jornalista TATOLI sira bele bá serbisu ho BERNAMA no husi BERNAMA bele mai serbisu ho TATOLI, ida-ne’e bele hasa’e entendimentu no koñesimentu entre Malázia no Timor-Leste.

Prezidente Konsellu Diretivu TATOLI, I.P, Noémio Falcão, subliña katak vizita BERNAMA nian mai Timor-Leste ne’e atu halo dokumentasaun ida ba sira-nia nesesidade, liuliu liga ho Timor-Leste nia adezaun ba ASEAN.

“Ami ko’alia kona-ba kestaun importante sira interese mútuo nian. Parte rua konkorda atu prepara projetu ida akordu kooperasaun nian ne’ebé sei asina iha loron 26 Outubru, bainhira Timor-Leste adere ofisialmente ba ASEAN. Pontu prinsipál sira husi projetu ne’e maka troka jornalista sira, formasaun, no troka konteúdu notísia entre nasaun rua nian”, nia esplika.

Sorumutu ne’e mós aborda kona-ba estabelesimentu korrespondente BERNAMA ida iha Timor-Leste no TATOLI ida iha Malázia. “Ida-ne’e sei hametin troka informasaun entre nasaun rua no apoia Timor-Leste nia pozisaun iha palku internasional”, Noémio afirma.

BERNAMA, Ajénsia Notísia Nasionál Malázia nian, maka ajénsia notísia ofisiál Governu Malázia nian, ne’ebé harii iha tinan 1967, liuhusi Lei Parlamentu nian no hahú operasaun iha loron 20 fulan-Maiu tinan 1968. Nia funsiona hanesan órgaun autónomu ida iha Ministériu Transporte nia okos no iha sede iha Wisma Bernama, Kumpur Lumpur.

TATOLI – Agência Noticiosa de Timor-Leste, I.P., nu’udar ajénsia notisioza ofisiál Timor-Leste nian, ne’ebé lansa iha loron 27 fulan-Jullu tinan 2016. Nu’udar fornesedora informasaun nasionál, TATOLI dezempeña papél vitál hodi hato’o notísia ofisiál Governu nian no dezenvolvimentu sira ikus liu iha Timor-Leste ba públiku, tantu doméstiku no internasionál.

Vizita BERNAMA nian bá TATOLI la’ós de’it marka esforsu atu hametin relasaun ho mídia, maibé reflete mós apoiu Malázia nian ba Timor-Leste bainhira konsolida nia pozisaun foun iha ASEAN nia laran.

Notísia relevante: BERNAMA TV Prepara Dokumentáriu kona-ba Timor – Leste

Jornalista: Arminda Fonseca 

Editora: Maria Auxiliadora