BERNAMA TV Prepara Dokumentáriu kona-ba Timor – Leste
DILI, 16 Setembru 2025 (TATOLI) – Produtór husi BERNAMA TV, Zikirullah Zolkefli hateten ninian prezensa hamutuk ho ekipa iha Timor-Leste nu’udar parte ida husi projetu espesiál hodi prodús dokumentáriu ida kona-ba Timor-Leste.
Zikirullah Zolkefli hato’o informasaun ne’e liu husi entrevista eskluziva ho TATOLI iha edifisiu Embaixada Malázia iha Timor-Leste, Palm Business Center, Tersa ne’e.
Nia subliña katak dokumentáriu ne’e hakarak hatudu istória sira ne’ebé úniku no interesante hosi Timor-Leste ba públiku.
“Ami nia prezensa iha ne’e loloos ne’e ba projetu espesiál ida, husu atu ami prepara dokumentáriu ida kona-ba Timor-Leste”, tenik Zikirullah.
Aleinde halo filmajen, ekipa BERNAMA TV mós hala’o entrevista ho parte oioin, inklui Embaixador Malázia iha Timor-Leste no ofisiál governu balun. Nia fiar katak Timor-Leste nia uniku merese atu komunidade Malázia koñese di’ak liu tan.
“Maibé hosi ha’u nia perspetiva nu’udar produtór iha ha’u nia unidade, ha’u foka liu ba istória Timor-Leste nian, saida maka interesante kona-ba Timor-Leste, no saida maka ha’u hakarak hatudu ba komunidade Malázia maka uniku Timor-Leste nian. Em jerál, ema Malázia sira hatene Timor-Leste. Maibé ami hakarak hatene istória iha istória nia kotuk iha Timor-Leste,” nia kontinua.
Ekipa BERNAMA TV kompostu hosi ema na’in 10, inklui produtór na’in-rua to’o tolu ho foku oioin, no mós jornalista ne’ebé delega atu hakerek notisia loroloron nian.
“Entaun loron-loron ami relata fali ba Kuala Lumpur kona-ba dezenvolvimentu sira ne’ebé akontese iha ne’e,” nia esplika.
Tuir informasaun ne’ebé TATOLI hetan, orariu kobertura BERNAMA nian iha Timor-Leste (16 – 22 Setembru 2025) inklui entrevista importante ho figura oioin, hanesan Prezidente Repúblika, José Ramos-Horta, Embaixador Malázia iha Timor-Leste no estudante ida iha Universidade Nasionál Timor Lorosa’e, Walesca Louna Araujo Costa.
Alende ne’e sei entrevista mós ho Vise-Ministra Negósiu Estranjeiru ba ASEAN, Milena Rangel, figura arte timoroan na’in rua, realizadór Adi Pereira no kantór Ego Lemos, Ministru Negósiu Estranjeiru no Kooperasaun, Bendito Freitas, Vise-Primeiru-Ministru Francisco Kalbuadi Lay no seluk tan.
Liuhusi atividade entrevista sira-ne’e, ekipa BERNAMA hein katak bele kapta perspetiva oioin kona-ba Timor-Leste, hosi perspetiva diplomátika, governamentál, no arte no kulturál, hodi bele hatudu iha dokumentáriu ne’ebé sei mai.
Jornalista : Cidalia Fátima
Editora : Armandina Moniz
