DILI, 24 Setembru 2025 (TATOLI)—Ekipa Vale de Lahane Football Club (VDL-sigla ingleza) sei prepara másimu antes hahú kompetisaun primeira divizaun Liga Futeból Femininu Timor-Leste (LFFTL).
Prezidente VDL FC, Dom Savio Lopez hato’o sentimentu kontente no agradese ba jogadora inklui ekipa treinadór sira tanba durante faze apuramentu hatudu rezultadu pozitivu nune’e lori VDL hakat bá primeira divizaun LFFTL.
“Agradese tanba ami hakat tan pasu ida iha primeira divizaun maibé ami tenke prepara di’ak liután,” Prezidente VDL FC informa ba TATOLI iha Estádiu Munisipál Dili, Kuarta ne’e.
Savio Lopez relata preparasaun ne’ebé VDL FC sei halo mak hanesan rekruta jogadora estranjeiru na’in-haat, masimiza treina, hasa’e fíziku jogadora no deside kampu hodi realiza treinu ho objetivu hametin espíritu koletiva jogadora sira liuliu iha konsisténsia hasoru kompetisaun primeira divizaun.
Notísia relevante: VDL FC liki São José 4-1, hakat bá primeira divizaun inkestionavel
Savio Lopez salienta VDL iha objetivu hakarak kompete iha primeira divizaun maibé konsideradu sei hakat liuhosi prosesu naruk tanba klube seluk ne’ebé iha LFFTL maioria reforsa husi jogadora sira ho kualidade aas no kompetitiva.
“Tenke treinu hodi kadi bebeik jogadora sira atu kontinua kaer bola,” Savio subliña.
Ekipa VDL FC serteja ona hakat bá primeira divizaun hafoin liuhosi apuramentu hala’o jogu haat hamutuk ho Na’in-Feto FC, enkuantu São José FC rasik tenke halakon ambisaun tanba falla kompete durante kualifikasaun iha faze apuramentu.
Entretantu, klube sanulu ne’ebé sei kompete iha primeira divizaun mak hanesan Buibere FC, AD-SLB, S’amuser FC, Maranatha FC, FC Kulugisa, Akadémika FC, UNITAL FC, Maudoko FC, VDL FC no Na’in-Feto FC.
Jornalista: Natalino Belo
Editór: Xisto Freitas da Piedade
