DILI, 23 Setembru 2025 (TATOLI)—Ekipa Vale de Lahane Football Club (VDL FC, sigla Inglés) serteja hakat ona ba kompetisaun primeira divizaun hafoin liki São José 4-1 iha jogu faze apuramentu Liga Futébol Femininu Timor-Leste (LFFTL).
VDL FC rekolla pontu tolu husi São José liuhosi jogu ikus ne’ebé realiza iha Estádiu Munisipál Dili, Tersa ne’e, iha-ne’ebé enxe husi jogadór sira hanesan Marilia (6) iha minutu-sanulu (10) no minutu 24 inklui Ricardina (11) minutu-30 hodi taka primeiru parte ho skor 3-0.
Hafoin tempu intervalu ramata, jogu segunda parte kontinua ho rezultadu VDL aumenta tan golu ida-ne’ebé enxe husi Marilia (6) iha minutu-63, enkuantu Eliyce (10) husi São José muda tabela skor 4-1 iha minutu-60.
Notísia relevante: VDL FC impata 4-4 ho Na’in-Feto
Ekipa VDL FC liuhosi apuramentu ultrapasa jogu haat ho vitória ne’ebé rezulta elementu Savio Lopes lidera tabela klasifikasaun ho pontu ualu (8), manán dala rua no impata dala rua.
Enkuantu, São José FC rasik obrigadu tenke hakoi mehi hakat bá LFFTL tanba rekolla pontu 0, iha-ne’ebé derrota dala haat durante realiza kompetisaun apuramentu LFFTL.
Rezultadu husi faze apuramentu serteja ona katak ekipa VDL FC no Na’in-Feto FC mak hakat bá primeira divizaun hodi kompleta klube sanulu LFFTL, iha-ne’ebé klube ualu seluk mak kompete iha primeira divizaun hanesan Buibere FC, AD-SLB, S’amuser FC, Maranatha FC, FC Kulugisa, Akadémika FC, UNITAL FC no Maudoko FC.
Jornalista: Natalino Belo
Editór: Xisto Freitas da Piedade
