DILI, 25 Setembru 2025 (TATOLI) – Primeiru-Ministru Kay Rala Xanana Gusmão informa, semana oin Governu submete ona Proposta Orsamentu Jerál Estadu (OJE) 2026 ba Parlamentu Nasionál (PN) hodi haree no avansa ba diskusaun.
“Ha’u informa ba Prezidente katak, iha loron 01 fulan-outubru ami sei haruka orsamentu foun ba Parlamentu Nasionál orsamentu 2026, maibé orsida ami sei haree hamutuk iha Konsellu Ministru,” Xanana hateten ba jornalista sira hafoin ramata enkontru semanál ho Xefe Estadu José Ramos-Horta iha Palásiu Przidensiál Dili, kinta ne’e.
Notísia relevante:PPN no PM diskute kalendáriu submisaun proposta OJE 2026 ba Parlamentu
Nia dehan, iha OJE 2026 sei iha problema barak tanba iha desizaun ne’ebé klaru hodi ko’a orsamentu kada liña ministriál sira.
“Orsamentu ida-ne’e sei iha problema barak, problema barak tanba ha’u ko’a iha ne’e, ko’a iha ne’ebá, tanba ita hakarak hadi’a,” Xefe Governu ne’e dehan.
Líder ezekutivu ne’e énfaze, halo redusaun ba OJE 2026 atu monta sistema di’ak ida ba administrasaun públika, setór saúde, edukasaun, tékniku no seluktan.
“Ita ko’a atu hadi’a, atu monta sistema ida ne’ebé di’ak, iha setór saúde, edukasaun no seluk tan,” nia konklui.
Notísia relevante:Parlamentu aprova orsamentu privativu millaun $19 ba tinan 2026
Jornalista: Hortencio Sanchez
Editór: Rafael Ximenes de A. Belo
