Parlamentu aprova orsamentu privativu millaun $19 ba tinan 2026
DILI, 24 Setembru 2025 (TATOLI)-Parlamentu Nasionál (PN), liuhusi reuniaun plenária estraordinária, aprova orsamentu privativu $19.073.404 ba tinan fiskál 2026.
Deputadu sira aprova projetu rezolusaun PN númeru 67/VI (3a) orsamentu PN ba 2026 ne’e ho votu a favór 37, kontra 0, abstensaun 19.
“Hodi nune’e ita-nia rezolusaun pasa”, Prezidente Parlamentu Nasionál, Maria Fernanda Lay, fó sai iha sala plenária, ohin.
Tuir lei númeru 12/2017, 24 Maiu, Lei Organizasaun no Funsionamentu Administrasaun Parlamentár, iha artigu 13 alínea a) iha númeru 1, kompete ba plenária PN aprova orsamentu anuál PN.
Sekretáriu-Jerál Parlamentu Nasionál, Edgar Sequeira Martins, hateten orsamentu privativu Parlamentu tenke liuhusi plenária hosi hetan aprovasaun hafoin envia ba Ministériu Finansa hodi ajusta ho proposta Orsamentu Jerál Estadu (OJE) ba 2026 ne’ebé Governu sei aprezenta ba PN iha loron 01 Outubru.
Sekretáriu-jerál dehan, ba tinan oin, PN iha prioridade ba programa haat, subprograma ualu no atividade 23.
Programa prioridade mak hanesan fomenta relasaun internasionál no kooperasaun Parlamentu, garante ezersísiu funsaun konstitusionál Parlamentu, promove kultura abertura no transparénsia iha Parlamentu no dezenvolvimentu institusionál.
Proposta orsamentu $19.073.404 ne’e aloka ba saláriu no vensimentu $11.217.005, bens no serbisu $6.242.298, transferénsia públika $955.180, kapitál menór $658.921 no kapitál dezenvolvimentu laiha.
Verba ba saláriu no vensimentu ne’e hodi selu saláriu deputadu, funsionáriu, asesór nasionál no internasionál.
Despeza bens no serbisu utiliza ba viajen estranjeiru, viajen lokál, estudu komparativu, fiskalizasaun komisaun, realiza atividade semináriu, prémiu Max Stahl, apoiu serbisu komisaun rekrutamentu ba prokuradór no juís, servisu sekretariadu, Grupu Feto Parlamentár Timor-Leste (GMPTL, sigla portugés), hodi realiza atividade komemora loron família, loron internasionál rurál no nasionál, kampaña 16 loron ativizmu violénsia kontra feto no labarik feto.
Inklui servisu jerál ba kombustivel, manutensaun karreta, manutensaun edifísiu, materiál eskritóriu, limpeza no seluk tan.
Ba transferénsia públika hodi finansia subvensaun anuál ba bankada parlamentár sira ho seluk tan.
Kapitál menór sosa ekipamentu information technology, eletróniku, ekipamentu, komunikasaun, seguransa, melloramentu ba servedór ho akizisaun ekipamentu sira seluk.
Tuir portál transparénsia Ministériu Finansa, to’o ohin PN ninia alokasaun OJE 2025 ho orijen $23,509,772, kompromisu $4,758,564.69, obrigasaun $492,177.15, atuál $11,350,627.78, saldu $6,908,402.38 no ezekusaun atinje 50,4%.
Notísia relevante: Orsamentu privativu PN iha 2025 millaun $23-resin aprovadu
Jornalista: Nelson de Sousa
Editora: Maria Auxiliadora
