DILI, 18 setembru 2024 (TATOLI)-Parlamentu Nasionál (PN) liuhusi reuniaun plenária estaordináriu, kuarta ne’e, aprova projetu rezolusaun númeru 49/VI(1a)-Orsamentu Parlamentu Nasionál ba tinan fiskál 2025 ho montante $23,947,310 aprovadu iha finál globál ho votu afavór 46, kontra 0 no abstensaun 16.
“Hodi nune’e orsamentu privativu Parlamentu Nasionál pasa,” Prezidente Parlamentu Nasionál, Maria Fernanda Lay, hato’o iha sala plenária.
Iha Proposta Orsamentu Jerál Estadu (OJE) 2025, PN prevee $23,947,310, mezmu antes ne’e hetan tetu husi Ministériu Finansa millaun $20.
Nune’e, Prezidente Parlamentu Nasionál (PN) fó sai katak iha debate OJE 2025, nia-parte sei aprezenta proposta hodi koa osan viajen estranjeiru iha proposta orsamentu PN nian hodi bele koresponde tetu ne’ebé Governu fó.
Proposta orsamentu privativu PN ba iha tinan fiskál 2025 ho montante $23,947,310 ne’e hodi prioriza programa fomentar relasaun internasionál no kooperasaun, Parlamentu prevee orsamentu $2,110,827 hodi implementa sub-programa rua (2) no atividade lima (5).
Programa garantir exersísiu funsaun konstituisionál, Parlamentu prevee $15,310, 888 ho nia sub-programa tolu (3) no atividade 29.
Progama promove kultura abertura no transparánsia, Parlamentu prevee $175,388 ho nia sub-programa ida (1) no atividade lima (5).
Programa funsionamentu no dezenvolvimentu instituisionál ne’e, Parlamentu prevee $6,350,208 ho sub-programa rua (2) no atividade 25.
Entertantu, tuir portál transparánsia ne’ebé Agência TATOLI asesu husi Ministériu Finansa, ohin haktuir katak Parlamentu Nasionál ninia ezekusaun Orsamentu Jeral Estadu (OJE) 2024 ho ninia orijen $17,780,054.00, kompromisu $ $394,893.90, obrigasaun sira $1,783,208.37, atuál $9,672,689.12, saldu $5,929,262.61 no ezekusaun % 64.4%.
Jornalista : Nelson de Sousa
Editór : Cancio Ximenes
