DILI, 26 Setembru 2025 (TATOLI) – Timor-Leste (TL) elojia ASEAN no Aliansa Pasífiku ba sira-nia esforsu kontínu hodi hametin kolaborasaun no avansa objetivu sira ne’ebé trasa ona iha Planu Serbisu 2021–2026.
Pozisaun Timor-Leste nian ne’e hato’o iha loron 24 fulan-Setembru 2025, bainhira partisipa iha Enkontru Ministeriál Aliansa ASEAN-Pasífiku ba daualu, ne’ebé hala’o iha marjen Sesaun Asembleia Jerál Nasaun Unidas nian ba dala-80 iha Nova Iorke.
Durante enkontru, Timor-Leste subliña katak nia adezaun ba ASEAN simboliza tantu konsolidasaun ba nia identidade rejionál no nia prontidaun atu kontribui ho signifikativu ba parseria sira ASEAN nian, inklui sira ne’ebé ho Aliansa Pasífiku.
Bainhira hetan admisaun formál nu’udar membru kompletu ASEAN nian, Timor-Leste iha intensaun atu envolve ativu liután iha parseria dinámiku ida-ne’e nia laran.
Nu’udar demokrasia joven ida no Estadu ki’ik ida ne’ebé dezenvolve hela, nia lori perspetiva úniku ida-ne’ebé iha abut iha nia kompromisu maka’as ba multilateralizmu no kooperasaun Súl-Súl.
“Timor-Leste konsidera Enkontru Ministeriál Aliansa ASEAN-Pasífiku nian liu fali fórum ida ba diálogu; ida-ne’e serve hanesan ponte vitál entre rejiaun vibrante rua ne’ebé unidu husi valór sira ne’ebé fahe hosi solidariedade no prosperidade mútua. Timor-Leste preparadu atu kontribui ho konstrutivu ba esforsu kolaborativu ida ne’e,” tenik iha nota ne’ebé TATOLI asesu husi media Permanent Mission of Timor-Leste to the United Nations in New York, ohin.
Iha enkontru ne’e diskute mós kona-ba Área prioridade sira kooperasaun ekonómika, edukasaun, siénsia no teknolojia, dezenvolvimentu sustentável, no rekuperasaun pós-pandemia aliña besik ho Timor-Leste nia objetivu dezenvolvimentu nasionál.
TATOLI
