DILI, 29 setembru 2025 (TATAOLI) – Eis-Prezidente Tribunál Rekursu (PTR), Deolindo dos Santos, husu membru Korpu Seguransa Pesoál (CSP, sigla portugés) atu labele fó ona seguransa ba nia hafoin Parlamentu Nasionál halo aprovasaun ho unanimidade ba revogasaun lei pensaun mensál vitálisia.
Nia dehan, nu’udar eis-titulár akompaña situasaun hotu, saida mak akontese iha Parlamentu, nune’e hafoin Parlamentu hako tiha aprovasaun nia husu seguransa sira ne’ebé fó seguransa ba nia momentu ne’e kedan la fó kedan seguransa.
“Ha’u nu’udar eis-Prezidente Tribunál Rekursu ne’ebé um dos benefisiáriu husi diploma ne’e rasik, maibé ha’u atu hateten de’it katak depois ha’u-nia fim de mandatu, to’o ohin saida mak ha’u hetan benefísu ne’e mak eskolta sira tuir ha’u ne’e de’it, restu husi benefisiariu sira seluk ne’e, hau la uza, nem, nem numa benefisiáriu sira seluk, tanba ha’u lakohi. Sira seluk ne’e ha’u lakohi goza, ha’u pretende atu renunsia,” Deolindo dos Santos, ko’alia iha Kaikoli, Kaikoli, segunda.
Nia dehan, bainhira diploma revogsaun lei pensaun mensál vitalísia revoga iha Parlamenmtu Nasionál, entaun hanesan eis- Prezidente Tribunál Rekursu momentu ne’ebá kedas kumpre kumpre lei ne’e, entaun hakarak ka lakohi tenke ser kumpre lei ne’e.
“Entun saida mak ha’u halo maka ne’e iha sesta feira ne’e, kuandu Parlamentu aprova espesialidade, signifika hein lei ne’e sei ba Prezidente Repúblika promulga, más ha’u ema ne’ebe ke iha direitu ba ida-ne’e, entaun iha sesta meudia ha’u hateten ona ba eskolta sira ne’ebé tuir ha’u ne’e katak imi labele tuir ha’u, maibé sira dehan katak sira hein desizaun. Maibé desde iha sesta ne’e ha’u dehan ona ba sira, labele tuir ha’u,” nia informa.
Deolindo dehan, iha estatutu eis titulár iha direitu atu goza buat hotu hanesan direitu ba karreta ne’ebé Estadu fó, fasilidade Estadu seluk inklui osan no estabelese gabinete eis-titulár.
“Maibé durante ne’e iha mak seguransa ne’e de’it, fasilidade sira seluk ne’e la goza. Tanba ha’u lakohi. Hanesan joven ida produtivu ha’u tenke ser kontribui ba rai ida-ne’e ho ha’u nia forma bainhira ha’u sei iha kondisaun,” nia katak.
Nia dehan, osan no fasilidade sira seluk hanesan eis Prezidente Tribunál Rekursu la utiliza hodi prefere utiliza ba povu nia nesesidade.
Nia hatutan, bainhira sei produtivu sei servisu nafatin juis karreira profisionál hodi simu osan tuir karreira juis nian.
“Osan sira seluk ne’e hela ba ita hotu, ba imi na’in hirak-ne’e, ba povu timor nian. Desde sesta feira ne’e kuandu ha’u rona aprovasaun ha’u dehan ba seguransa sira labele tuir ha’u, tanba ha’u komprende regra,” nia hateten.
Durante ne’e iha membru Korpu Seguransa Pesoál na’in-haat mak akompaña nia, maibé ohin dadersan sira la tuir ona, maske sira dehan hein orientsaun komandu, maibé desde sesta feira sira labele tuir ona.
Eis PTR ne’e dehan, durante ne’e nia la estabelese gabinete eis titutár no la hetan rezidénsia Estadu nian, maibé hela iha uma rasik.
“Dezde ha’u-nia mandatu hotu iha 29 abríl, ha’u la goza buat ruma, baut sira-ne’ebé agora ha’u hetan no ha’u goza ne’e hanesan juis konselleiru iha Tribunál Rekursu n, ezemplu karreta ne’ebé ha’u uza ne’e karreta Tribunal Rekursu nian la’ós hanesan eis prezidente tribunal rekursu nian,” nia katak.
“Ha’u la uza karreta, nem numa fasilidade hanesan hanesan titulár, ha’u mak lakohi duni. Ha’u dehan katak ha’u sei produtivu, ha’u hakarak kontribui ba rai ida-ne’e ho forma ha’u nian. Tanba ida mak ha’u dehan lae ,ha’u lakohi goza buat sira-ne’e, buat-ne’ebé agora ha’u hetan ne’e mak tuir estatutu juis sira nian fó mai mak ha’u uza ne’e,” nia haktuir.
Notísia relevante: Prezidente Ramos-Horta promulga Lei Revoga Pensaun Mensál Vitalísia
Jornalista: Natalino Costa
Editór: Evaristo Soares Martins
