DILI, 29 Setembru 2025 (TATOLI)—Prezidente Repúblika, José Ramos-Horta, segunda ne’e, promulga ona Lei Revoga Pensaun Mensál Vitalísia ba Depuatdu no Eis-Titulár Órgaun Soberania no Providénsia sira seluk ne’ebé Parlamentu Nasionál aprova ho unanimidade iha kinta (25 Setembru 2025) ho votu afavór 62, kontra no abstensaun 0.
Notísia Relevante: Parlamentu aprova projetu Lei Revoga Pensaun Mensál Vitalísia iha finál globál
Xefe Estadu ne’e hatutan, nu’udar Xefe Estadu nia tula iha nia kbaas responsabilidade ne’ebé todan atu promulga (ka lae) Dekretu Parlamentu Nasionál No. 21/2025, ne’ebé revoga pensaun vitalísia no benefísiu sira seluk ne’ebé fó ba eis-deputadu sira, eis-membru Governu sira, no eis-xefe órgaun soberanu sira tanba desizaun ida-ne’e retroativu ba loron 20 fulan-Maiu tinan 2002.
“Ohin, hodi promulga lei ida-ne’e, ha’u reafirma ha’u-nia konfiansa iha ita-nia povu nia maturidade polítika no iha ita-nia kapasidade koletiva atu hasoru dezafiu sira-ne’ebé ita hasoru iha etapa hotu-hotu. Atu solidariedade no dignidade umanu kontinua orienta ita-nia destinu komún,” Prezidente Ramos-Horta hateten ba jornalista sira liuhusi konferénsia imprensa ne’ebé hala’o iha Palásiu Prezidensiál Nicolau Lobato, Bairru Pite.
Xefe Estadu ne’e dehan, ida-ne’e mak momentu signifikativu ida husi demokrasia joven, la’ós de’it ba nia implikasaun edukasionál no koretivu tanba hadi’a lei anteriór sira-ne’ebé viola prinsípiu ekuidade, maibé mós signifikativu ba konsekuénsia umanu no sosiál ne’ebé desizaun ida-ne’e sei iha ba família timoroan balun nia moris.
“Lei ida-ne’e hetan aprovasaun hosi Parlamentu Nasionál ho unanimidade absoluta proeza ida ne’ebé ladún akontese iha tinan 23 ita-nia independénsia ne’ebé restaura ona. Ha’u hakarak fó hanoin ba ita-boot sira katak Konstituisaun Repúblika, ne’ebé aprova iha 2002, nein Planu Estratéjiku Dezenvolvimentu (2011-2030), nein mós Tratadu Fronteira Marítima ho Austrália (2018) hetan konsensu tomak hanesan ne’e,” Horta haktuir.
Tuir Horta, lei ida-ne’e, reflete inequívoku reprezentante povu hotu-hotu no Governu Konstitusionál Konstitusionál da-sia (IX) nia vontade.
“Ida-ne’e mós espresa sentimentu sira husi porsaun boot ida hosi ita-nia sosiedade, inklui líder polítiku sira-ne’ebé, durante kampaña eleitorál sira 2023 nian, publikamente kompromete atu halakon lei pensaun vitalísia nian. Hodi promulga lei ida-ne’e, ha’u halo ida-ne’e hafoin konsiderasaun kle’an,” nia dehan.
Nia hatutan, lei ne’e revoga, sei afeta lider no ativista sira-nia moris luta naruk ba ukun rasik-an.
“Lei ida-ne’e la hasai sira-nia direitu nu’udar veteranu no sira-nia direitu konsagradu ba reforma ida ne’ebé dignu no justu. Ha’u rekomenda atu Governu konsidera tranzisaun ida-ne’ebé rasionál no justa iha implementasaun Lei ida-ne’e, hodi garante solusaun sira-ne’ebé dignu,” nia hateten.
Antes promulga, Prezidente Repúblika ko’alia ona ho Primeiru-Ministru Kay Rala Xanana Gusmão da-rua (2) kona-ba asuntu ida-ne’e no sente hakmatek katak Governu konsidera hela solusaun sira-ne’ebé justu no dignu ho ativu.
“Ha’u mós ko’alia ona ho Prezidente Tribunál Rekursu, Prokuradór Jerál Repúblika, Provedór Justisa no Direitus Umanus, Ministru Asuntu Veteranu, Xefe Estadu Maiór F-FDTL, eis Xefe Estadu Maiór no ha’u-nia Asesór Superiór, Jeneral Lere, joven universitáriu sira, no membru rezisténsia sira,” Horta afirma.
Dalan ba demokrasia taka ho opsaun sira-ne’ebé susar. Nasaun ida-nia grandeza sukat la’ós de’it ho korajen atu halo reforma, maibé mós ho umanidade ne’ebé nia trata nia sidadaun sira inklui sira-ne’ebé serbí Estadu.
Notísia Relevante: Ramos-Horta: Revogasaun ba Lei Pensaun Vitalísia la presiza haruka ba Tribunál
Jornalista : Hortencio Sanchez
Editór : Cancio Ximenes
