DILI, 26 Setembru 2025 (TATOLI) – Prezidente Repúblika José Ramos-Horta hateten, revogasaun Lei Pensaun Mensál Vitalísia la presiza haruka ba Tribunál Rekursu no nia rasik sei uza kompeténsia hodi promulga.
“Ha’u fiar katak sei la lori ba Tribunál Rekursu, ha’u lee ona. La iha problema konstitusionál,” Prezidente Ramos-Horta hateten ba jornalista sira iha Palásiu Prezidensiál, Prezidente Nicolau Lobato Dili, sesta kalan ne’e.
Nia dehan, Lei Pensaun Mensál Vitalísia la presiza duni no orsamentu sira bele aloka ba setór produtivu no hadi’a kualidade edukasaun iha nasaun ne’e.
“Pensaun Vitalísia ha’u la konkorda duni, di’ak liu osan sira ne’e tau ba setór produtivu, tau ba edukasaun, dezenvolvimentu rurál hodi hatuun problema ki’ak iha rai-laran,” nia dehan.
Agradese estudante
Xefe Estadu ne’e hatutan tan, “Foin daudaun ne’e mak ha’u simu Lei ne’e mai husi Parlamentu Nasionál. Agora kedan ha’u buka ko’alia ho Maun Xanana tanba nia nu’udar Primeiru-Ministru, eis-titular Orgaun Soberania tenke halo diálogu ho nia, maibé ha’u tenke lee tan lai mak sei hola desizaun, maibé laiha problema konstitusionál, maibé aban hanesan ne’e ha’u bele haree hodi promulga”.
“Ha’u agradese ba alin estudante Universitariu sira. Sira-nia asaun pozitivu tebes reflete duni ba ba sentimentu sosiedade tomak, ida-ne’e mak Parlamentu Nasionál lalais aprova revogasaun ba Lei Pensaun Mensál Vitalisia ne’e. Parabéns ba Estdante sira ne’e husu sira kontinua nafatin kontrola atu nasaun ne’e bele moris nafatin iha dame,” nia tenik.
Tuir observasaun ne’ebé Ramos-Horta halo deputadu no membru Governu ne’ebé asumi de’it kargu tinan-lima maibé hetan ona pensaun vitalísia ne’ebé ho montante boot no koitadu ho Profesór sira ne’ebé hanorin iha área rurál saláriu kada fulan $200 no ida ne’e konsidera injustisa.
“Pensaun ne’e la justu duni. Joven sira iha razaun no ha’u agradese ba sira-nia intervensaun hodi kurize buat ne’e, ha’u hanoin maun Xanana mós konkorda atu halo lakon lei ne’e tanba dezde 2007 nia hatudu kedan ona nia pozisaun la konkorda lei pensaun vitalísia, entaun ita muda ida ne’e konforme lei aprova ne’e,” Horta hakotu.
Jornalista: Hortencio Sanchez
Editór: Rafael Ximenes de A. Belo
