DILI, 30 Setembru 2025 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár (AIFAESA, sigla portugés), ne’ebé dirije husi Inspetora Jerál, Odete Viegás, sei esforsu hodi buka tuir distribuidór ne’ebé kontinua halo importasaun sigaru ilísitu hodi kontinua faan iha Timor-Leste.
Notísia Relevante: Alfándega sei reativa ekipa konjunta halo operasaun ba importasaun tabaku ilísitu
Inspetora Jerál, Odete Viegás, hateten situasaun ne’e sai dilema duni ba negosiante sira-ne’ebé faan sigaru-rahun iha merkadu, tanba ema sira-ne’e mai ho ekonómia ne’ebé ki’ik hodi suspende sira-nia moris, ho nune’e mak AIFAESA seidauk halo atuasaun ba sira no halo de’it mak divulgasaun informasaun.
“Maibé ami mós iha hanoin katak atu buka mak distribuidór boot sira-ne’ebé hatama sigaru ilísitu, entaun daudaun ne’e ekipa haree hela kestaun ida-ne’e. Tanba, sigaru ne’ebé sira faan ninia embalajen ne’ebé latuir kritéria ne’ebé Governu liuhusi Ministériu Saúde fó sai,” Inspetora Jerál ne’e informa ba jornalista sira iha nia kna’ar fatin, Matadoru, ohin.
Signifika, nia dehan, ida-ne’e ilegál ona entaun atu atua ida-ne’e la’ós fasíl tanba sigaru sira-ne’e kuazé sirkula hotu ona iha ita-nia rai.
Antes ne’e, iha 03 -Setembru 2025, AIFAESA divulga no halo esplikasaun ba operadór ekonómiku sira kona-ba sirkulasaun tabaku ne’ebé livremente sein selu taxa ba iha Governu, tanba ne’e operadór negosiante ne’ebé kontinua faan sei hetan koima hahú husi $70 to’o $1.000.
Jornalista : Alexandra da Costa
Editór : Cancio Ximenes
