DILI, 23 Setembru 2025 (TATOLI)—Autoridade Aduaneira (AA)/Alfándega sei reativa ekipa konjunta hodi halo operasaun ba atividade importasaun tabaku ilísitu husi Indonézia liuhusi fronteira terrestre sira.
Komisáriu AA/Alfandega, Joanico Pinto hateten, daudaun ne’e sira-nia ekipa ho ekipa konjunta ida halo hela observasaun ba merkadu sira hotu iha rai-laran no deteta katak movimentasaun sigaru ilísitu ne’e hahú sa’e.
“Kuantidade importasaun ilegál sigaru ilísitu ne’e kontinua sa’e tamba ami-nia atividade patrullamentu ida-ne’e hapara desde kargu Diretór ne’ebé nomeia ne’e matebian hotu ona, entaun hahú husi momentu ne’ebá mak parradu to’o agora,” Komisáriu hato’o ba Jornalista sira iha Ministériu Finansa (MF), Aitarak-Laran, Segunda ne’e.
Notísia relevante : AIFAESA-PNTL presiza kontrola sériu importasaun tabaku ilísitu iha Timor-Leste
Nia dehan, hafoin halo observasaun iha merkadu, ekipa konsidera iha nesesidade atu reativa ekipa konjunta hodi bele halo patrullamentu no operasaun iha área ne’ebé identifikadu, nune’e ba oin sei koordena nafatin ho forma segredu tamba bainhira identifika fatin maka labele halo atuasaun ba operasaun ilegál ne’e rasik.
“Loos duni situasaun ne’e sai preokupasaun no ami sei halo atuasaun liuhusi prezensa seguransa, prosesu ne’e sei halo, maibé ha’u labele dehan bainhira no halo iha ne’ebé,” nia akresenta.
Ekipa responsável normalmente deteta importasaun sigaru ilegál no sasán proibidu sira seluk liuhusi rute formál fronteira nian liuhusi mákina raiu-x ne’ebé modernu no di’ak.
“Bainhira ami deteta sei hasai sasán sira ne’e no lori ba entrega iha parte kompeténsia atu rezolve tuir lei, maibé bainhira sigaru ne’e mak ho kuantidade barak liu, mekanizmu seluk maka ami tenke sunu hotu,” nia katak.
Jornalista : Alexandra da Costa
Editora : Julia Chatarina
