DILI, 30 Setembru 2025 (TATOLI)–Ministru Justisa (MJ), Sergio Hornai, tersa ne’e, hasoru malu ho Xefe Estadu José Ramos-Horta hodi relata kona-ba progresu instalasaun Tribunál Supremu Justisa.
“Enkontru ho Prezidente Repúblika atu atualiza servisu balun ne’ebé ami halo, liuliu kona-ba instalasaun Tribunál Supremiu Justisa nia progresu to’o ona iha ne’ebé, no halo koordenasaun entre Tribunál Rekursu, Parlamentu Nasionál ho Prezidensia Repúblika atu ita bele haree ona asuntu balun ba iha prosesu instalasaun ne’e,” Ministru Sergio hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, tuir lei organizasaun judisiáriu presiza halo roteiru ne’ebé estabelese ona entre Governu hamutuk ho Parlamentu Nasionál, Prezidensia Repúblika no Tribunál Rekursu atu prepara hodi priense sekuénsia hotu ba instalasaun Tribunál Supremu Justisa referidu.
“Ida-ne’e atu reforsa ita-nia setór justisa iha servisu sira ba iha alargamentu ba administrasaun justisa nian oinsa atu halo rekrutamentu ba Juiz, Prokuradór, Defensór, Advogadu, Ofisiál Justisa, nune’e mós ita-nia órgaun Polísia Kriminál sira-nia servisu, ne’ebé Estadu tenke tau importánsia nafatin,” nia dehan.
Kona-ba instalasaun ne’e rasik, Governu prepara ona ema balun atu dezigna tur iha komisaun selesaun rekrutamentu hahú husi Prezidensia Repúblika, Parlamentu Nasionál no Governu halo de’it reforsu iha jestaun balun ba iha ekipamentu ne’ebé naton, atu nune’e komisaun instalasaun sira bele hala’o servisu ho di’ak.
“Ita presiza instala servisu grupu ida, nune’e bele halo servisu hodi nune’e bele aprezenta ba Governu ba iha Parlamentu Nasionál no ba iha Prezidensia Repúblika rasik,” nia dehan.
Ministru ne’e subliña, kona-ba fatin atu estabelese Tribunál Supremu Justisa, Prezidente Repúblika sei halo inspesaun iha fatin balun hafoin foti desizaun.
“Fatin, ita-nia Prezidente Repúblika sei halo inspesaun. Haree took, ida iha fatin uluk iha Kolmera ne’e, eis-Tribunál Primeira Instánsia nia fatin ne’e, tanba fatin ne’e Tribunál la utiliza ona. Entaun, ita sei haree hodi ko’alia ho Prezidente Tribunál Rekursu atu ita bele instala ba Tribunál Supremu Justisa ka labele, ita sei tuur hamutuk ko’alia,” nia dehan.
Notísia Relevante: “Tribunál Supremu Justisa tenke estabelese no inaugura iha 2026”
Jornalista : Hortencio Sanchez
Editór : Cancio Ximenes
