DILI, 01 Outubru 2025 (TATOLI)—Inspetór Jerál iha Ministériu Edukasaun (ME), Rodolfo Aparício informa ME identifika eskola balun iha Dili implementa merenda eskolár la tuir menu ne’ebé iha.
“Ami simu informasaun hosi inspetór eskolár katak iha eskola balun implementa la tuir menu ne’ebé iha. Ne’e tanba menu iha terrenu mak laiha duni hanesan ikan, manutolun, ai-fuan sira,” Inspetór Jerál Rodolfo dehan ba TATOLI, iha INFORDEPE Balide, Dili, Kuarta ne’e.
Notísia relevante: Tinan ne’e Governu aloka millaun $34 ba programa merenda eskolár
Aparício hatutan eskola ne’ebé iha área rurál liuliu dook hosi sidade mak difísil hetan menu sira-ne’e maibé iha sidade ne’e laiha problema.
“Normalmente eskola hotu-hotu enfrenta problema hanesan maibé ida-ne’e kompeténsia Prezidente Autoridade Munisípiu sira tanba tuir Dekretu-Lei 62/2023. Programa merenda eskolár iha tiha ona Autoridade Munisipál nia okos no superintendente no inspetór edukasaun halo kontrolu de’it ba ninia implementasaun,” nia esplika.
Entretantu, Diretór Servisu Edukasaun Munisípiu Dili, Sabino da Costa Pereira hateten totál alunu ne’ebé asesu ba merenda eskolár hamutuk 64.040 ho nia totál $5.137.288,80, husi totál alokadu Governu hamutuk millaun $34.
Nia esplika loron efetivu implementa merenda eskolár ne’e hamutuk 191.
Jornalista: Osória Marques
Editór: Xisto Freitas da Piedade
