DILI, 17 Marsu 2025 (TATOLI)–Ministru Administrasaun Estatál (MAE), Tomás do Rosário Cabral, hateten Governu aloka millaun $34 ba programa merenda eskolár ba eskola hotu-hotu iha teritóriu.
“Orsamentu ba merenda eskolar ne’e distribui ba munisípiu hotu. Munisípiu Dili iha orsamentu boot liu kuaze millaun $5, Governu sentrál kontrola de’it ninia ezekusaun”, Governante ne’e dehan iha Ataúru.
Ministru Tomás Cabral haktuir programa merenda eskolár hahú daudaun iha munisípiu hotu-hotu no programa merenda eskolár Ataúru hahú funsiona iha fulan-Fevereiru.
Ministru ne’e garante, governu sentrál transfere hela orsamentu merenda eskolár iha fulan tolu-tolu. Dekretu-lei ezekusaun ne’e dehan merenda eskolár transfere osan kada fulan tolu.
Kona-ba menu ba merenda eskolár, Ministru hatán iha Ajénsia Internasionál husi Nasoins Unida servisu ho Ministériu Saúde. Menu mak 75% produtu lokál.
Diretór Servisu Edukasaun Munisípiu Dili, Sabino da Costa Pereira, hateten totál alunu ne’ebé asesu ba merenda eskolár hamutuk 64.040 ho nia totál orsamentu alokadu hamutuk $5.137.288,80.
Loron efetivu implementa merenda eskolár ne’e hamutuk 191. Kona-ba menu ba merenda eskolár, nia dehan nafatin maibé ida-ne’e EJP sira mak prepara tanba totál osan referida ne’e inklui ona ho pagamentu ba Grupu EJP sira.
Notísia relevante: Governu aprova Atribuisaun Subsídiu Programa Merenda Eskolár
Jornalista : Osória Marques
Editora : Rita Almeida
