DILI, 07 Marsu 2025 (TATOLI) – Konsellu Ministru aprova projetu dekretu Governu ne’ebé aprezenta husi Ministru Administrasaun Estatál, Tomás do Rosário Cabral, kona-ba kondisaun sira ba Atribuisaun Subsídiu Programa Merenda Eskolár.
“Governu rekoñese importánsia nutrisaun ne’ebé adekuada ba kreximentu saudavel, aprendizajen efikás no redusaun dezigualdade”, refere nota imprensa ne’ebé Tatoli asesu, ohin.
Programa Merenda Eskolár ne’e mosu nu’udar inisiativa estratéjika ida hodi garante asesu universál no ekuitativu ba refeisaun nutritiva iha estabelesimentu edukasaun pré-eskolár no ensinu báziku iha país.
Objetivu husi programa ida-ne’e maka la’ós de’it atu kombate inseguransa ai-han no hadi’a dezempeñu eskolár, maibé mós atu promove dezenvolvimentu sustentavel ba komunidade lokál sira liuhusi enkoraja produsaun no konsumu ai-han husi agrikultura lokál.
“Tanba ne’e, implementasaun husi Programa Merenda Eskolár ne’e nu’udar kompromisu ida husi Estadu ba moris-di’ak no futuru labarik sira-nian, hodi kontribui ba halakon hamlaha, hametin ekonomia lokál no dezenvolvimentu kapitál umanu timoroan nian”.
Jornalista: Arminda Fonseca
Editora: Maria Auxiliadora
