DILI, 05 Outobru 2025 (TATOLI)-Eis-Prezidente da Repúblika, Taur Matan Ruak, husu ba Governu atu investiga kazu jogu online ne’ebé akontese iha Timor-Leste.
Matan Ruak mós agradese Governu tanba determina kanselamentu lisensa ne’ebé fó ba operasaun jogu no aposta online.
Eis-Primeiru-Ministru ne’e sujere atu labele taka de’it jogu ne’e, maibé tenke investiga kle’an autór hotu ne’ebé envolve no trata tuir lei.
“Tanba krime organizadu ne’e envolve atividade barak hanesan tráfiku, droga, prostituisaun ne’ebé bele fó impaktu ba ita-nia nasaun”, nia hato’o iha ámbitu diálogu ho organizasaun arte marsiál IKS-PTL, iha salaun St. Madalena Canossa, sábadu ne’e.
Antes ne’e, Ministru Interiór, Francisco da Costa Guterres, hateten jogu online no online scam ne’e Governu entrega ona ba parte investigasaun.
“Krime online scam ne’e ita entrega ba investigasaun. Ita lalika ko’alia kona-ba buat ne’e, tanba iha ona PCIC [Polísia Sientífika Investigasaun Kriminál]”, Ministru Interiór informa foin lalais ne’e.
Nia dehan Governu labele halo fali PCIC nian serbisu tanba idaidak ho ninia tarefa.
“Ami labele, Primeiru-Ministru mós ko’alia ona ba asuntu krime online ne’e. Iha instituisaun ne’ebé haree ba buat ne’e, la’ós ita hotu ba haree lisuk, ne’e iha instituisaun ida-ne’ebé apropriada ba ida-ne’ebá”, nia akresenta.
Notísia relevante : PSIK ho SNI buska apreensaun no desmantela jogu online ilegál iha Oekusi
Jornalista: Alexandra da Costa
Editora: Maria Auxiliadora
