OEKUSI, 26 Agostu 2025 (TATOLI) – Polísia Siéntifika Investigasaun Kriminál (PSIK), hamutuk ho Serbisu Nasionál Intelejénsia (SNI) tersa kalan ne’e, hala’o vizita supreza ida, hodi halo buska apreensaun no desmentela ba jogu online ilegál rua hanesan esplorasaun jogu ilisitu kriminoza jogu online, no mós burla informátika, rede scam call center transnasionál, ne’ebé instala husi empreza internasionál Seagull Resort husi nasaun Malázia iha otél Oé-Upun Rejiaun Administrativa Espesiál Oé-kusi Ambeno (RAEOA).
“Atividade esplorasaun jogu ilisita no kriminoza, ne’ebé apreensaun ne’e, ita identifika katak, iha atividade kriminál rua; ida mak esplorasaun ba jogu ilisitu ida seluk mak atividade burla informátika, ne’ebé ligasaun ho rede scam call center transnasionál, ne’ebé durante ne’e, hala’o ona oprasaun iha Zona Aziátiku nian,” Investigadór husi PSIK, Dedi Álvaro da Silva, informa, ba jornalista sira iha otél Oé-Upun kalan ne’e.
Notísia relevante:Posibilidade, Empreza estranjeira sei loke jogu online durante tinan-50 iha Oekusi
Dirijente ne’e, esplika, atividade esplorasaun jogu ilisitu no kriminoza ne’e, ekipa PSIK no SNI konsege halo apreensaun ba objetu ka evidénsia sira hanesan, desktop unidade 87, laptop 13, telemovel iha 194, flas-diks 3, aces point ka wifi 1, starlink router 2 no mós simcard Telkomsel Indonézia nian 135.
Objetu ba atividade burla informátika halo apreensaun ba desktop 58, laptop 4, mákina impresora 1, mákina sura osan ida (1), pontu asesu (acces point) rua (2) no mós telemovél iha 44.
Entretantu, kona-ba dokumentu ne’ebé traballadór sira uza hodi hala’o serbisu, daudaun ekipa konjunta sei kontinua iha faze identifikasaun, tanba prosesu kontinuasaun ba kazu referidu ba iha interrogatóriu judisiál.
“Normálmente, kazu ne’e fragante de leite, sei ba iha prosesu interrogatóriu judisiál, ne’ebé atividade ne’ebé hala’o ona otél Oé-Upun, ita desmantela rede krimonuzu transnasionál ida, ne’ebé koñesidu iha zona iha Asian nian, tanba antes ne’e akontese mós iha nasaun Myanmar, Kambodia ikus iha Filipina, entaun hafoin ami identifika sentru ne’e mós instala iha Timor-Leste,” nia dehan.
Notísia relevante:Empreza Shanghai hakarak investe millaun $70 hodi reabilita ótel fitun lima Oe-Upu
Jornalista Ajénsia Tatoli,I.P tenta konfirma asuntu ne’e ho jestór empreza Seagell Resort, maibé laiha fatin, tanba daudaun ne’e hala’o hela serbisu iha Dili.
Maibé, tuir observasaun Jornalista Ajénsia Tatoli,I.P, nota, iha terrenu nota, ekipa SNI ho PSIK, ne’e tama derrepente de’it, no konsege sita telefone tantu jestór no traballadór sira, inklui sita mós mós sistema aplikasi jogu online ne’e, akontese dahuluk iha loron segunda kalan tuku 21:00 kalan.
Tuirmai, ekipa konjunta kontinua identifika tan pesoál ka traballadór sira tantu timoroan no estranjeiru iha kuartu idak-idak, hodi halo entervista, konsege identifka maioria feto mai husi nasaun Indonézia, Xina, Malázia no Singapura.
Hafoin hala’o pasa-revista ba traballadór sira, errepenti ahi eletrisidade mate, ne’ebé deskonfia, nune’e, ekipa konjunta kontinua rekolla informasaun kada traballadór sira husi estranjeiru, no konsege identifika autór prinsipál ne’ebé taka ahi derrepente ne’e, nune’e, ekipa PSIK investiga kona-ba motivu ne’e.
Tanba laiha rezultadu, ekipa konjunta koordena kedas ba ekipa Eletrisidade de Timor-Leste (EDTL) Oekusi, liutiha minutu balun ekipa EDTL to’o kedas fatin, no hamoris fila-fali ahi eletrisidade ne’e iha tuku 01:30.
Hafoin ahi lakan, ekipa SNI ho PSIK kontinua asegura traballadór sira tantu timoroan no estranjeiru iha sala serbisu to’o tersa kalan ne’e, hodi hein prosesu kontinuasaun ba iha Ministériu Públiku.
Jornalista: Abílio Elo Nini
Editór: Rafael Ximenes de A. Belo
