DILI, 11 abríl 2024 (TATOLI)- Prezidente Autoridade Rejiaun Espesiál Oé-Cusse Ambeno (RAEOA),Rogério Tiago de Fátima Lobato, hatete, empreza hosi nasaun Xina ho naran Shanghai hakarak investe osan hamutuk millaun $70 hodi reabilita Ótel fitun lima Oe-Upu iha Oé-Cusse.
“Ha’u mai hasoru Prezidente Repúblika lori mós investór hosi nasaun Xina ho naran Shanghai ne’ebé hakarak investe liuliu halo reabilitasaun ba ótel fitun lima iha Óe-Cusse ne’ebé Governu lakon tiha osan maibé abandona hela,” Rogério katak ba jornalista sira iha Palásiu Prezidensiál Dili, kinta ne’e.
Nia esplika, la’ós halo reabilitasaun de’it maibé atu aumenta ótel ne’e boot liutan ho kondisaun ne’ebé di’ak fó benefisiu ba Oe-Cusse.
“Ótel ne’e ita tenke halo reabilitasaun duni, tanba agora investór barak mak hakarak ba investe iha Oé-Cusse, bainhira ita nia investór sira ba Oé-Cusse presiza fatin ne’ebé dignu ba sira hodi hela,” nia tenik.
Daudaun ne’e, Prezidente RAEOA asina ona memorandu ho empreza Shanghai maibé tuir lei ne’ebé iha Prezidente RAEOA bele selebra asina memorandu ba investimentu to’o de’it millaun $20.
“Maske ha’u asina ona nota ida ho Shanghai maibé tuir lei ne’ebé iha ha’u so autoriza osan to’o de’it millaun $20, se liu ida ne’e desizaun Governu sentrál. Tanba investimentu ne’e boot liu millaun $70 mak ha’u lori ona planu no grupu ne’e mai aprezenta ona iha Primeiru Ministru nune’e bele lori ba iha Konsellu Ministru mak bele hola desizaun,” katak.
Tuir nia, bainhira Governu sentrál aprova ona, la kle’ur investór tenke aselera ona prosesu.
“Ha’u ko’alia ona ho empreza, bainhira hetan aprovasaun hosi Konsellu Ministru fó prazu semana ida ba sira atu loke sira nia konta iha Oé-Cusse ho osan ne’ebé sira ko’alia, no servisu hotu ba Ótel ne’e tenke la’o ona,” nia tenik.
Rekorda fali katak, Ótel fitun lima ne’e inisia hosi Eis Prezidente RAEOA Marí Alkatiri iha tinan 2015.
Ho nune’e iha tinan 2015 hahú fatuk dala uluk ba konstrusaun Ótel fitun lima ne’e.
Konstrusaun ne’e utiliza orsamentu Estadu hamutuk millaun $10-resin ne’ebé konstroi hosi empreza TCPA.
Maibé to’o ohin loron Ótel ne’e seidauk finaliza maske Governu gasta ona osan hamutuk millaun $10-resin.
Notísia relevante:Empreza hosi Xina hakarak investe setór turizmu no ospitalidade iha Oé-Cusse
Jornalista: Hortencio Sanchez
Editór: Florencio Miranda Ximenes
