DILI, 07 Outubru 2025 (TATOLI)–Ministru Negósiu Estranjeiru no Kooperasaun (MNEK) dadaun ne’e hala’o vizita traballu ba Brunei Darusalam hodi lobi polítika no ko’alia ho lider nasaun referidu hodi diskute kona-ba área espesífiku ne’ebé nasaun rua presiza dezenvolve hamutuk.
“Ha’u diskute ona ho Dato Seri Setia Haji Erywan Pehin Datu Pekerma Jaya Haji Mohd. Yusof, Ministru Negósiu Estranjeiru Brunei Darussalam. Timor-Leste hein atu servisu besik ho Brunei hodi identifika área kooperasaun espesífiku sira, hodi aproveita forsa no esperiénsia Brunei nian hodi apoia Timor-Leste nia fortalesimentu institusionál no dezenvolvimentu rekursu umanu, hodi permite nasaun ne’e atu partisipa ativu no kontribui ho signifikativu iha ASEAN nia laran,” Ministru Bendito hateten liuhusi nota ne’ebé TATOLI asesu husi mídia MNEK, ohin.
Durante iha Brunei, Ministru Bendito ho ekipa hasoru malu ho His Majesty Sultan Haj Hassanal Bolkiah Mu’izzaann Waddaulah Sultan no Yang Di-Pertuan ne’ebé hato’o parabéns ba Timor-Leste, tanba sai nu’udar membru plenu ASEAN ba da-11 iha Simeira ASEAN ba da-47 ne’ebé sei akontese iha fulan-Outubru mai ne’e.
Tanba ne’e, apoiu kontinuasaun Brunei Darussalam nian ba Timor-Leste integra iha família ASEAN. Sua Majestade destaka mós relasaun amizade no maun-alin entre nasaun rua ne’e no hato’o votu di’ak Prezidente Repúblika José Ramos-Horta no Primeiru-Ministru Kay Rala Xanana Gusmão.
Parte rua ne’e reafirma sira nia kompromisu hamutuk atu aprofunda relasaun bilaterál sira no atu esplora kooperasaun prátika ne’ebé promove pás rejionál, prosperidade, no solidariedade, tuir Vizaun ASEAN 2025–2045.
Nune’e, Ministru Bendito hato’o nia apresiasaun kle’an ba Brunei Darussalam nia apoiu firme ba Timor-Leste nia adezaun ba ASEAN, no subliña katak serbisu ne’ebé importante liu hahú hafoin adezaun, bainhira Timor-Leste hahú nia viajen ba integrasaun pós-adezaun ba ASEAN.
Jornalista : Hortencio Sanchez
Editór : Cancio Ximenes
